MLA Shankar Mandekar – राजगड तालुक्याच्या पर्यटन विकासाला गती देण्यासाठी आणि शिवरायांच्या जाज्वल्य इतिहासाचे जतन करण्यासाठी शुक्रवारी (दि. २४) ‘हेरिटेज व्हू रिसॉर्ट’ येथे विविध कार्यक्रमांचे आयोजन करण्यात आले होते. यावेळी राष्ट्रवादी काँग्रेसचे आमदार शंकर मांडेकर यांनी छत्रपती शिवाजी महाराजांच्या पुतळ्याला अभिवादन करून कार्यक्रमाची सुरुवात केली.

गुणेश पुरंदरे यांच्या ‘दिग्विजय प्रतिष्ठान’तर्फे आयोजित ‘२५ किल्ल्यांच्या अश्व मोहिमेचे’ राजगड तालुक्यात आगमन होताच पारंपरिक पद्धतीने ढोल-ताशांच्या गजरात स्वागत करण्यात आले. यावेळी आ. मांडेकर यांच्या हस्ते महाराजांच्या राजमुद्रेचे, शस्त्रांचे आणि अश्वांचे विधिवत पूजन करण्यात आले. त्यानंतर महाराजांची भव्य अश्वारूढ मिरवणूक काढण्यात आली, ज्याने संपूर्ण परिसर शिवमय झाला होता.

याच सोहळ्यात तालुक्यातील पर्यटनाला चालना देणाऱ्या दोन महत्त्वाच्या प्रकल्पांचे उद्घाटन करण्यात आले. ज्यामध्ये नंदनवन कृषी पर्यटन केंद्र, KK ट्रॅव्हल्स. यावेळी आमदार मांडेकर यांच्या हस्ते गुणेश पुरंदरे, वन विभागाच्या दया डोमे, ऋषिकेश कोल्हापुरे, नेहा कासार, इतिहास संशोधक संतोष मोरे, कविता मोरे आणि लक्ष्मण खेडेकर यांचा गौरवचिन्ह व शाल-श्रीफळ देऊन सन्मान करण्यात आला.

या सोहळ्याला पंचायत समिती सभापती सुवर्णा राऊत, उपसभापती संदीप खुटवड, जिल्हा परिषद कृषी सभापती अमोल नलावडे, तानाजी मांगडे, संतोष दसवडकर, अंकुश दसवडकर, प्रमोद लोहकरे यांसह अनेक पदाधिकारी, आजी-माजी सदस्य आणि मोठ्या संख्येने शिवभक्त उपस्थित होते.

दिवाळीत ‘राजगड महोत्सव’
आमदार मांडेकर यांनी तालुक्यातील रस्ते विकास आणि पर्यटन वाढीसाठी उपलब्ध करून दिलेल्या निधीची माहिती दिली. विशेष म्हणजे, छत्रपती शिवाजी महाराज आग्रा येथून सुटका करून घेऊन राजगडावर सुखरूप परतले, या ऐतिहासिक घटनेच्या स्मरणार्थ येणाऱ्या दीपावलीमध्ये ‘भव्य दिव्य राजगड महोत्सव’ साजरा करण्याची घोषणा त्यांनी यावेळी केली.