Pune-Mumbai Expressway :  पुणे – मुंबई एक्सप्रेसवेवरील मिसिंग लिंक प्रकल्पातील एका कनेक्टिंग बोगद्यात धावत्या कारवर अचानक दगड कोसळल्याची धक्कादायक घटना घडली. चालकाच्या प्रसंगावधानामुळे मोठा अपघात टळला असून कारमधील सर्व प्रवासी सुखरूप बचावले.

मिळालेल्या माहितीनुसार, सायंकाळी सुमारे ५.१७ वाजता चारचाकी (एमएच ४६ सीएम १९८९) बोगदा क्रमांक २ मधून पुण्याकडे जात असताना बोगद्याच्या भागातून अचानक मोठा दगड कारच्या समोरील काचेवर आदळला. या धडकेत कारची विंडशील्ड पूर्णपणे फुटली.

अचानक घडलेल्या प्रकारामुळे कारमधील प्रवासी घाबरले, मात्र चालकाने शांतपणे वाहनावरील नियंत्रण राखल्याने मोठी दुर्घटना टळली. घटनेची माहिती मिळताच खंडाळा महामार्ग पोलीस केंद्राचे पोलीस उपनिरीक्षक समीर कटपाळे आणि एमएसएफचे जवान सुरेश ढेरे यांनी तातडीने घटनास्थळी धाव घेऊन पाहणी केली.

प्रवाशांचा प्रवास अधिक सुरक्षित आणि जलद व्हावा या उद्देशाने कोट्यवधी रुपये खर्चून उभारण्यात आलेला मिसिंग लिंक प्रकल्प नुकताच वाहतुकीसाठी खुला करण्यात आला आहे. मात्र, पहिल्याच पावसात बोगद्याच्या भागातून दगड कोसळल्याने प्रकल्पाच्या दर्जाबाबत आणि सुरक्षेच्या उपाययोजनांबाबत प्रश्न उपस्थित होत आहेत.

या घटनेनंतर नागरिकांनी प्रशासनाकडे काही गंभीर प्रश्न उपस्थित केले आहेत. पहिल्याच पावसात दगड कोसळत असतील तर कामाच्या गुणवत्तेचे काय, बोगदे, डोंगरउतार आणि संरक्षण जाळ्यांची नियमित तपासणी केली जाते का, भविष्यात अशी घटना जीवघेणी ठरल्यास त्याची जबाबदारी कोण घेणार, असा सवाल वाहनचालकांकडून केला जात आहे.

Satara: पूर्ण कारभारी नसल्याने जिल्हा रुग्णालय निर्णयाविना रुग्णांना मनस्ताप; डॉ. राहुल जाधव यांच्या नियुक्तीचा प्रस्ताव अजूनही प्रलंबित