MI vs PBKS : आयपीएल २०२६ च्या लीग स्टेजमधील एक महत्त्वाचा सामना आज, १४ मे रोजी पंजाब किंग्स आणि मुंबई इंडियन्स (MI vs PBKS) यांच्यात खेळवला जाणार आहे.

हा सामना हिमाचल प्रदेश क्रिकेट असोसिएशन स्टेडियम, धरमशाला येथे होणार असून, पंजाब किंग्ससाठी हा सामना प्लेऑफच्या दृष्टीने अत्यंत निर्णायक ठरणार आहे.

मुंबई इंडियन्स या हंगामात प्लेऑफच्या शर्यतीतून पूर्णपणे बाहेर पडली आहे. त्यामुळे त्यांच्यासाठी हा सामना (MI vs PBKS) केवळ औपचारिकता राहिला आहे. मात्र पंजाब किंग्सची स्थिती वेगळी आहे.

संघाने गेल्या चार सामन्यांत सलग पराभव स्वीकारला असून, प्लेऑफसाठी त्यांना उरलेल्या दोन्ही सामन्यांत विजय आवश्यक आहे. मुंबईविरुद्धचा सामना जिंकणे हे त्यांच्यासमोर सर्वात मोठे आव्हान आहे.

धरमशाला मैदान आणि संघांची तयारी
धरमशाला हे पंजाब किंग्सचे घरचे मैदान मानले जाते. मात्र याच मैदानावर त्यांनी मागील सामना गमावला होता. आता पुन्हा एकदा याच मैदानावर विजय मिळवून आपली प्लेऑफची आशा जिवंत ठेवण्याचा प्रयत्न पंजाब करणार आहे. आरसीबीविरुद्धच्या सामन्यानंतर मुंबई इंडियन्सचा संघ थेट धरमशालाकडे रवाना झाला आहे. दोन्ही संघांच्या सराव सत्रांचे व्हीडिओ सोशल मीडियावर व्हायरल होत आहेत.

पावसाचे सावट
दुर्दैवाने, या सामन्यावर पावसाचे मोठे सावट आहे. ॲक्युवेदरच्या अंदाजानुसार, धरमशाला येथे आज सकाळी ११ ते सायंकाळी ६ च्या दरम्यान ४० ते ६० टक्के पावसाची शक्यता व्यक्त करण्यात आली आहे. जरी सामन्यादरम्यान पाऊस पडला नाही तरी, जर मैदान सलग ६ ते ७ तास ओले राहिले तर आऊटफिल्ड योग्य स्थितीत नसल्याने सामनाधिकारी आणि पंच सामना खेळण्यास नकार देऊ शकतात. अशा परिस्थितीत सामना रद्द होण्याची किंवा पूर्णपणे व्यत्यय येण्याची शक्यता आहे.

सामना रद्द झाल्यास काय होईल?
सध्याच्या स्थितीनुसार पंजाब किंग्सने ६ सामने जिंकले आहेत आणि एक सामना रद्द झाला आहे, त्यामुळे त्यांच्याकडे १३ गुण आहेत. जर आजचा सामना रद्द झाला तर दोन्ही संघांना प्रत्येकी १ गुण मिळेल. यानंतर पंजाबची गुणसंख्या १४ होईल.

दुसरीकडे, आरसीबी आणि गुजरात टायटन्स १६ गुणांसह पहिल्या दोन स्थानांवर आहेत आणि त्यांचे प्लेऑफ स्थान जवळपास निश्चित झाले आहे. सनरायझर्स हैदराबाद १४ गुणांसह तिसऱ्या स्थानावर आहे. चेन्नई सुपर किंग्स आणि राजस्थान रॉयल्स हे दोन्ही संघ देखील प्लेऑफ शर्यतीत कायम आहेत. या दोघांपैकी एखादा संघ उरलेले सर्व सामने जिंकला तर पंजाबला मागे टाकून प्लेऑफमध्ये स्थान मिळवू शकतो.

पंजाब किंग्ससाठी हा सामना जिंकणे अत्यंत गरजेचे आहे. मात्र पावसामुळे सामना रद्द झाल्यास त्यांचा प्लेऑफचा मार्ग आणखी कठीण होईल. मुंबई इंडियन्ससाठीही हा सामना रद्द होणे निराशाजनक ठरेल, कारण ते स्पर्धेतून बाहेर असले तरी चांगली कामगिरी करून हंगामाचा चांगला शेवट करण्याचा त्यांचा प्रयत्न असेल.