Donald Trump – अमेरिकेचे राष्ट्राध्यक्ष डोनाल्ड ट्रम्प यांचे वागणे परदेशी नेत्यांबाबत अनपेक्षित असते. याच कारणामुळे सावध पवित्रा घेत जून महिन्‍यात फ्रान्समध्ये पंतप्रधान नरेंद्र मोदी आणि अमेरिकन राष्ट्राध्यक्ष यांच्यातील चर्चेनंतर प्रसारमाध्यमांशी संवाद किंवा संयुक्त पत्रकार परिषद न घेण्याचे भारताने पसंत केले होते, अशी माहिती सरकारी सूत्रांनी सोमवारी दिली.

भारतातील अमेरिकेचे राजदूत सर्जियो गोर यांनी केलेल्या विधानानंतर हा खुलासा करण्यात आला आहे. ते इकॉनॉमिक टाइम्स वर्ल्ड लीडर्स फोरममध्ये बोलत होते. गोर म्‍हणाले की, मोदी-ट्रम्प भेटीपूर्वीच नवी दिल्लीने अमेरिकेला कळवले होते की त्यांना संयुक्त पत्रकार परिषद घ्यायची नाही. नेत्यांच्या सार्वजनिक उपस्थितीबाबतची चर्चा ही प्रमाणित कार्यपद्धती (प्रोटोकॉल) आणि नियमित राजनैतिक प्रक्रियेचाच एक भाग असल्याचे सूत्रांनी अधोरेखित केले.

जी-७ शिखर परिषदेच्या पार्श्वभूमीवर १७ जून रोजी एव्हियन-लेस-बेन्स येथे मोदी आणि ट्रम्प यांच्यात द्विपक्षीय चर्चा झाली होती. या भेटीकडे मागील वर्षभरात तणावपूर्ण बनलेले द्विपक्षीय संबंध सुधारण्याच्या दिशेने टाकलेले एक पाऊल म्हणून पाहिले गेले होते. दोन्ही देशांमधील संबंधांची तीव्रता कमी होत असतानाच हा नवीन वाद समोर आला आहे. तसेच, ज्या द्विपक्षीय व्यापार कराराची खूप चर्चा झाली होती, तो करारही अद्याप प्रलंबित आहे.

गेल्या आठवड्याच्या शेवटी एका संवादात्मक सत्रादरम्यान ट्रम्प आणि मोदी यांच्यातील मैत्रीचा संदर्भ देत गोर यांनी फ्रान्समधील त्या रिसॉर्ट शहरात दोन्ही नेत्यांमध्ये झालेल्या प्रत्यक्ष भेटीचा उल्लेख केला. गोर म्‍हणाले, आम्ही पडद्यामागे, मंचाच्या मागे होतो आणि एका क्षणी तिथे फक्त राष्ट्राध्यक्ष आणि मीच होतो.

त्यांनी मला विचारले की भारतीय कोणते मुद्दे उपस्थित करणार आहेत. आम्ही काही विषयांवर चर्चा केली. त्यांनी (ट्रम्प) विचारले, त्यांची (भारताची) काही विशेष विनंती आहे का? त्यावर मी सांगितले की परराष्ट्र मंत्रालयाची एक विनंती होती. त्यांनी सांगितले होते की, आपण प्रसारमाध्यमांना आत आणूया, पण पूर्ण पत्रकार परिषद नको.

त्यानंतर पत्रकारांच्या उपस्थितीत बैठकीला सुरुवात झाली. मोदी आणि ट्रम्प एकमेकांसमोर बसले असताना आणि त्यांनी आपले प्रास्ताविक भाषण केले, तेव्हा खोलीत सुमारे ५० कॅमेरे होते. परंतु, प्रास्ताविक भाषण संपताच ट्रम्प कॅमेऱ्यांकडे वळले आणि त्यांनी पत्रकारांना विचारले, काही प्रश्न आहेत का? गोर यांच्या मते, या एका प्रश्नाने संपूर्ण संवादाची दिशा बदलली. आणि तिथून सगळंच सुरू झाले, असे सांगत राजदूतांनी सांगितले की, यानंतर ४५ मिनिटांची पत्रकार परिषद झाली, यामध्ये प्रत्येक मुद्द्यावर उघडपणे चर्चा झाली.