जामखेड (अहिल्यानगर): हायकोर्ट संभाजीनगर यांच्या आदेशाने आणि नगरपरिषदेच्या मुख्य अधिकाऱ्यांच्या मार्गदर्शनाखाली शहरात सुरू असलेल्या अतिक्रमणविरोधी मोहिमेदरम्यान नगरपरिषदेच्या कर्मचाऱ्यांवर दगडफेक करून मारहाण केल्याची घटना घडली आहे. बीड रोड परिसरातील अष्टेकर स्नेक्स (हॉटेल) जवळील अतिक्रमण हटवत असताना हॉटेल चालकांकडून कर्मचाऱ्यांवर दगडफेक करून जीवे मारण्याची धमकी देण्यात आली.

या प्रकरणी नगरपरिषदेचे कर्मचारी संभाजी अजिनाथ डोके (वय ३०, रा. भुतवडा, ता. जामखेड) यांनी दिलेल्या फिर्यादीवरून विजय आहेकर, त्यांची पत्नी आणि दत्तात्रय आहेकर (सर्व रा. बीड रोड, जामखेड) यांच्याविरुद्ध जामखेड पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, ६ ऑक्टोबर २०२६ रोजी सकाळी ९:३० वाजल्यापासून बीड रोड येथील शासकीय दुध डेअरीपासून अतिक्रमण हटवण्याचे काम सुरू होते. दुपारी १:३० च्या सुमारास अतिक्रमण विरोधी पथक बीड रोडवरील ‘अष्टेकर स्नेक्स’ (हॉटेल) जवळ पोहोचले. त्यावेळी तेथील अतिक्रमण काढत असताना, विजय अष्टेकर आणि त्यांच्या पत्नीने स्लॅबवरून नगरपरिषद कर्मचाऱ्यांच्या अंगावर दगड फेकून मारले.

या दगडफेकीत फिर्यादी संभाजी डोके यांच्या पाठीवर व उजव्या मांडीवर दगड लागून ते जखमी झाले, तर ब्रेकर चालक ऑपरेटर तुषार अशोक शेळके यांच्या हातालाही दगड लागला. दगडफेकीनंतर आरोपी दत्तात्रय अष्टेकर याने शिवीगाळ करत फिर्यादी संभाजी डोके यांची गचांडी धरून त्यांना लाथाबुक्क्यांनी मारहाण केली व खाली पाडले. पोलिसांनी तातडीने हस्तक्षेप करून त्यांना सोडवले. आरोपींनी “तुम्ही आमच्या हॉटेलचे अतिक्रमण काढले तर तुम्हाला जिवंत सोडणार नाही” अशी धमकी दिली.

या घटनेनंतर जखमी कर्मचाऱ्यावर जामखेड येथील ग्रामीण रुग्णालयात उपचार करण्यात आले असून, नगरपरिषदेच्या कामात अडथळा आणून कर्मचाऱ्यांना मारहाण केल्याप्रकरणी पोलिसांत गुन्हा दाखल करण्यात आला आहे. या प्रकरणाचा पुढील तपास जामखेड पोलीस करत आहेत.

Khopoli : खोपोलीतील डॉ. केजरीवाल यांच्या रुग्णालयात नवजात बालकाच्या मृत्यूचा गंभीर आरोप; पीडित कुटुंबीय आक्रमक