प्रभात वृत्तसेवा कोयनानगर – हेळवाक जिल्हा परिषद गटासाठी पक्षनिष्ठ, जनसंपर्कात आघाडीवर आणि सामाजिक कार्यात नेहमी पुढे असणारे लक्ष्मण झोरे यांनाच उमेदवारी द्यावी, अशी ठाम मागणी स्थानिक कार्यकर्त्यांकडून करण्यात आली आहे.पालकमंत्री ना. शंभूराज देसाई यांचे अत्यंत विश्वासू कार्यकर्ते म्हणून झोरे ओळखले जातात. पक्ष संघटन बळकट करणे, कार्यकर्त्यांना जोडून ठेवणे आणि विकासकामांमध्ये सक्रिय सहभाग घेणे या बाबींमध्ये त्यांनी नेहमी आघाडी घेतली आहे. तळागाळातील जनतेशी असलेला थेट संपर्क आणि कार्यनिष्ठा ही त्यांची जमेची बाजू मानली जाते.झोरे यांनी अहिल्यादेवी होळकर पुतळा उभारणीच्या कामात सक्रीय सहभाग नोंदवून समाजातील एकता आणि स्वाभिमान जपण्यासाठी मोलाचे योगदान दिले आहे. सामाजिक प्रश्नांवर त्यांनी सातत्याने पुढाकार घेतला असून, ग्रामविकासाशी निगडित अनेक उपक्रमांना त्यांनी गती दिली आहे. त्यामुळे कार्यकर्त्यांमध्ये त्यांच्या नेतृत्वावर ठाम विश्वास निर्माण झाला आहे. या पार्श्वभूमीवर नुकत्याच झालेल्या कार्यकर्त्यांच्या बैठकीत लक्ष्मण झोरे यांच्या उमेदवारीसाठी एकमुखी ठराव मंजूर करण्यात आला. लक्ष्मण झोरे हे सातत्य, समर्पण आणि जनसंपर्क या गुणांमुळे स्थानिक राजकारणात आपलं वेगळं स्थान निर्माण करण्यात यशस्वी झाले आहेत. त्यांच्या उमेदवारीमुळे पक्षाला नवसंजीवनी मिळेल, असा विश्वास कार्यकर्त्यांनी व्यक्त केला आहे.
