प्रभात वृत्तसेवा
लोणी काळभोर – आगामी काळातील जिल्हा परिषद, पंचायत समिती निवडणुकांच्या पार्श्वभूमीवर कदमवाकवस्ती येथील माजी सरपंचांसह शेकडो कार्यकर्त्यांनी भाजपचे जिल्हाध्यक्ष प्रदीप कंद यांच्या नेतृत्वाखाली भाजपमध्ये प्रवेश केला आहे. भारतीय जनता पक्षात कार्यकर्त्यांची इन कमिंग सुरू झाल्याने आगामी निवडणुकीच्या दृष्टिकोनातून भाजपची परिसरात ताकद वाढली आहे.मुंबई येथे भाजपा कार्यालयात प्रदेशाध्यक्ष रवींद्र चव्हाण यांच्या प्रमुख उपस्थितीत एका कार्यक्रमाचे आयोजन करण्यात आले होते.

या कार्यक्रमात कदमवाकवस्तीचे माजी सरपंच चित्तरंजन गायकवाड, गौरी गायकवाड, उपसरपंच नासिरखान पठाण, सदस्य आकाश धनंजय काळभोर, कोमल काळभोर, सिमिता लोंढे, बीना काळभोर, राजश्री काळभोर, मंदाकिनी नामुगडे यांच्यासह शेकडो कार्यकर्त्यांनी भाजपचा झेंडा हाती घेतला आहे. यावेळी दौंडचे आमदार राहुल कुल, प्रदीप कंद व भाजपचे पदाधिकारी मोठ्या संख्येने उपस्थित होते.

प्रदीप कंद म्हणाले कदमवाकवस्तीतील माजी सरपंच, उपसरपंच, व सदस्यांनी आज भाजपात प्रवेश केला आहे. त्यामुळे भाजप पक्ष जिल्ह्यात अधिक मजबूत स्थितीमध्ये आहे. आगामी काळाच्या निवडणुकांच्या पार्श्वभूमीवर हे चांगले संकेत आहे. जिल्ह्यातील हजारो कार्यकर्ते भाजपामध्ये प्रवेश करण्यासाठी इच्छुक असून लवकरच पक्षप्रवेश करतील. आणि याचा ग्रामीण भागात पक्ष बळकट करण्यासाठी फायदा होईल. चित्तरंजन गायकवाड यांचा जनसंपर्क चांगला आहे.

त्यांनी भाजपचे कामगार आघाडीचे अध्यक्षपद भूषविले आहे. तर त्यांच्या पत्नी गौरी गायकवाड या कदमवाकवस्तीच्या पहिल्या लोकनियुक्त सरपंच आहेत. भाजपचे जिल्हाध्यक्ष प्रदीप कंद हे गायकवाड कुटुंबियांची समजूत काढून मतपरिवर्तन करण्यास यशस्वी ठरले आहेत. कंद यांच्या मार्गदर्शनाखाली पूर्व हवेलीतील शेकडो कार्यकर्त्यांनी आज कमळ हाती घेतले आहे.