Cricketer Fined 1 Lakh For Texting Girlfriend During TNPL Match : सामना सुरू असताना ‘प्लेअर अँड मॅच ऑफिशियल्स एरिया’मध्ये (PMOA) बसून आपल्या प्रेयसीशी (Girlfriend) मोबाईलवर चॅटिंग करणे एका युवा क्रिकेटपटूला चांगलेच महागात पडले आहे. तमिळनाडू प्रीमियर लीग (TNPL) दरम्यान बीसीसीआयच्या भ्रष्टाचारविरोधी आणि सुरक्षा विभागाच्या (ACSU) सुरक्षा प्रोटोकॉलचे उल्लंघन केल्याप्रकरणी या खेळाडूला १ लाख रुपयांचा दंड ठोठावण्यात आला आहे. या कारवाईमुळे स्थानिक क्रिकेट वर्तुळात मोठी खळबळ उडाली आहे.

प्रतिबंधित क्षेत्रात मोबाईल वापरल्याने कारवाई –

एसीएसयूने या गंभीर उल्लंघनाची माहिती तमिळनाडू क्रिकेट असोसिएशनला (TNCA) दिल्यानंतर ही शिस्तभंगाची कारवाई करण्यात आली. बीसीसीआयच्या कठोर नियमांनुसार खेळाडू, सपोर्ट स्टाफ आणि अधिकाऱ्यांना ड्रेसिंग रूम किंवा पीएसओए (PMOA) क्षेत्रात मोबाईल फोन अथवा कोणतेही कम्युनिकेशन डिव्हाइस वापरण्यास सक्त मनाई आहे. या नियमानुसार, अशा प्रतिबंधित क्षेत्रात प्रवेश करण्यापूर्वी मोबाईल फोन आणि स्मार्टवॉच बंद करून सुरक्षा कर्मचाऱ्यांकडे जमा करणे बंधनकारक असते.

दोन वर्षांच्या बंदीची होती शक्यता; अखेर दंडावर निभावले –

टीएनसीएच्या एका वरिष्ठ अधिकाऱ्याने दिलेल्या माहितीनुसार, संबंधित २६ वर्षीय खेळाडू डावखुरा फलंदाज असून त्याने गेल्या रणजी हंगामात तमिळनाडूकडून दोन अर्धशतके झळकावली आहेत. तपासात स्पष्ट झाले की, हा खेळाडू सामना सुरू असताना गर्लफ्रेंडला मेसेज करत होता. यात कोणताही मॅच फिक्सिंग किंवा भ्रष्टाचाराचा प्रकार आढळला नाही, तरीही प्रोटोकॉल मोडल्याने त्याच्यावर सुरुवातीला दोन वर्षांची बंदी घालण्याचा विचार सुरू होता. मात्र, प्रकरणाचे गांभीर्य लक्षात घेऊन अखेर १ लाखांचा दंड आकारून हे प्रकरण मिटवण्यात आले.

हेही वाचा – Devdutt Padikkal Century : गॉलमध्ये देवदत्त पडिक्कलचा शतकी धमाका! चेतेश्वर पुजाराचा मिळाला खरा वारसदार

आयपीएलमध्येही घडली होती अशीच घटना –

सामन्यादरम्यान मोबाईल फोन वापरल्यामुळे कारवाई होण्याची ही पहिलीच वेळ नाही. यापूर्वी आयपीएलमध्ये अशीच कारवाई पाहायला मिळाली होती. राजस्थान रॉयल्सचे मॅनेजर रोमी भिंडर यांच्यावर डगआऊटमध्ये मोबाईल फोन वापरल्याप्रकरणी बीसीसीआयने १ लाख रुपयांचा दंड ठोठावला होता. ताज्या घटनेनंतर आता खेळाडूंना सुरक्षा नियमांचे काटेकोरपणे पालन करण्याचे कडक निर्देश देण्यात आले आहेत.