मुंबई – ग्लोबल इन्व्हेस्टर्स समिट (GIS-23) संदर्भात 16 देशांमध्ये आयोजित केलेल्या रोड शोच्या यशानंतर मुख्यमंत्री योगी आदित्यनाथ स्वतः देशांतर्गत रोड शोची जबाबदारी घेतील. 5 जानेवारी ते 27 जानेवारी दरम्यान देशातील नऊ मोठ्या शहरांमध्ये होणाऱ्या या रोड शोची सुरुवात मुंबईतून होणार आहे.

सीएम योगी 4 आणि 5 जानेवारीला दोन दिवस आयोजित करण्यात येणाऱ्या विविध कार्यक्रमांमध्ये सहभागी होणार आहेत. यादरम्यान, ते उत्तर प्रदेशचे विकसनशील चित्र ठेवतील आणि देशातील मोठ्या औद्योगिक समूहांच्या प्रतिनिधींना भेटतील आणि त्यांना यूपीमध्ये गुंतवणूक करण्यासाठी आमंत्रित करतील.

मात्र, त्यांच्या दौऱ्याचे बॅनर्स मुख्यमंत्री एकनाथ शिंदे यांच्या वर्षा या सरकारी निवासस्थानाबाहेर लागले आहेत. त्यामुळे आश्चर्य व्यक्त केलं जात आहे. तसेच महाराष्ट्रातील उद्योग गुजरातला गेल्यानंतर आता उत्तर प्रदेशात गुंतवणूक वाढवण्यासाठी योगी आदित्यनाथ मुंबईत येत असल्याने या दौऱ्याची चांगलीच चर्चा होत आहे.

अशात मुंबईतील मुख्यमंत्र्यांचं वर्षा निवासस्थान तसेच मलबार हिल परिसरात उत्तर प्रदेशचे मुख्यमंत्री योगी आदित्यनाथ यांच्या स्वागताचे बॅनर्स लागले आहेत.   मुंबईतील नामांकित आणि ज्येष्ठ उद्योगपती आणि उद्योगसमूहांशी योगी आदित्यनाथ हे आज सायंकाळी आणि गुरुवारी दिवसभर भेटी आणि बैठका घेऊन चर्चा करणार आहेत, सध्या या बॅनरवरून चांगलीच चर्चा होत आहे.

5 जानेवारी रोजी, सीएम योगींच्या दौऱ्याची सुरुवात सकाळी बँकर्स आणि फिनटेक क्षेत्राशी संबंधित लोकांशी संवाद साधून होईल. यानंतर  योगी मुंबई रोड शोमध्ये सहभागी होणार आहे. येथे टाटा समूह, रिलायन्स इंडस्ट्रीज, महिंद्रा, गोदरेज, आदित्य बिर्ला समूह, पिरामल एंटरप्रायझेस, पार्ले अॅग्रो, जेएसडब्ल्यू समूह आणि स्टार आणि डिस्ने समूहाचे प्रतिनिधी भेटतील. इतर फेरीत हिंदुजा ग्रुप, हिंदुस्थान युनि लिव्हर, अदानी ग्रुप, हिरानंदानी ग्रुप, टोरेंट पॉवर, वोक्हार्ट, इंडियन मर्चंट्स चेंबर्स, रुवा अॅडव्हायझर्स, केकेआर इंडिया, हिंदुजा ग्रुप, एव्हर स्टोन ग्रुप, हिरो सायकल्स, आरपीजी एंटरप्राइज, एल अँड टी, रॅमकी ग्रुप ऑफ कंपन्या इत्यादी मोठ्या औद्योगिक समूह आणि कंपन्यांशी चर्चा करतील.