Vidhan Parishad Election 2026 : विधान परिषद निवडणुकीच्या पार्श्वभूमीवर महायुतीतील जागावाटपाचा फॉर्म्युला निश्चित झाल्याचे सांगितले जात असतानाच यवतमाळ मतदारसंघातून नवा राजकीय ट्विस्ट समोर आला आहे. महायुतीच्या वाटपानुसार ही जागा शिवसेनेच्या वाट्याला गेली असतानाही भाजपचे जिल्हा समन्वयक नितीन भुतडा यांनी उमेदवारी अर्ज दाखल करण्याची तयारी केल्याने राजकीय चर्चांना उधाण आले आहे. (Vidhan Parishad Election 2026)

राज्यातील 17 विधान परिषद जागांसाठी निवडणूक होत असून उमेदवारी अर्ज दाखल करण्यासाठी सोमवार हा अखेरचा दिवस आहे. या पार्श्वभूमीवर महायुती आणि महाविकास आघाडीमध्ये उमेदवार निश्चित करण्यासाठी जोरदार हालचाली सुरू आहेत. मात्र यवतमाळमधील घडामोडींमुळे महायुतीतील अंतर्गत नाराजी पुन्हा एकदा समोर आली आहे. (Vidhan Parishad Election 2026)

महायुतीच्या अंतिम फॉर्म्युलानुसार भाजप 11, शिवसेना 4 आणि राष्ट्रवादी 2 जागांवर निवडणूक लढवणार आहे. स्थानिक स्वराज्य संस्थांमध्ये संख्याबळ अधिक असल्यामुळे भाजपने अधिक जागांची मागणी केली होती. मात्र युतीधर्म पाळत भाजपने शिवसेनेला चार जागा दिल्याचे बोलले जात आहे. (Vidhan Parishad Election 2026)

अशातच यवतमाळची जागा शिवसेनेच्या वाट्याला गेली असतानाही नितीन भुतडा उमेदवारी अर्ज दाखल करणार असल्याची माहिती समोर आली आहे. त्यामुळे भाजप आणि शिवसेनेत मतभेद वाढल्याच्या चर्चा सुरू झाल्या आहेत. (Vidhan Parishad Election 2026)

मात्र यावर प्रतिक्रिया देताना नितीन भुतडा यांनी आपण बंडखोरी करत नसल्याचे स्पष्ट केले आहे. पक्षाच्या वरिष्ठ नेत्यांच्या सूचनेनुसारच उमेदवारी अर्ज दाखल करणार असून पक्षाने आदेश दिल्यास अर्ज मागे घेण्यासही तयार असल्याचे त्यांनी सांगितले. त्यामुळे हा दबावतंत्राचा भाग आहे की पर्यायी उमेदवारी, याबाबत तर्क-वितर्क लावले जात आहेत. (Vidhan Parishad Election 2026)

दरम्यान, महायुतीतील जागावाटपानुसार भाजपकडे सोलापूर, जळगाव, नागपूर, नांदेड, अहिल्यानगर, सांगली-सातारा यांसह 11 जागा जाणार आहेत. तर शिवसेनेकडे ठाणे, नाशिक, परभणी-हिंगोली आणि यवतमाळ या चार जागा राहणार आहेत. राष्ट्रवादी काँग्रेसकडे पुणे आणि कोकण या दोन जागा देण्यात आल्याचे समजते. (Vidhan Parishad Election 2026)

यवतमाळमधील या घडामोडींमुळे महायुतीतील समन्वयावर प्रश्नचिन्ह निर्माण झाले असून, उमेदवारी अर्ज मागे घेण्याच्या अंतिम मुदतीपर्यंत राजकीय नाट्य रंगण्याची शक्यता व्यक्त केली जात आहे. (Vidhan Parishad Election 2026)