थेऊर : थेऊर रोडवरील उड्डाणपुलाला काही दिवसांपूर्वी मोठा खड्डा पडल्याच्या पार्श्वभूमीवर सार्वजनिक बांधकाम विभागाकडून पुलाच्या संरक्षणात्मक कामांना सुरुवात करण्यात आली आहे. या सुरू असलेल्या कामाची शिरूर-हवेलीचे आमदार ज्ञानेश्वर कटके यांनी प्रत्यक्ष पाहणी करून कामाचा आढावा घेतला.

यावेळी आमदार कटके यांनी पुलाच्या दुरुस्ती कामाचा दर्जा, कामाची प्रगती तसेच नागरिकांच्या सुरक्षिततेच्या दृष्टीने करण्यात येणार्‍या उपाययोजनांची माहिती घेतली. काम उच्च दर्जाचे, सुरक्षित आणि निर्धारित वेळेत पूर्ण करण्यात यावे. तसेच दुरुस्तीच्या काळात वाहतुकीला अडथळा निर्माण होणार नाही, यासाठी आवश्यक नियोजन करण्याच्या सूचना संबंधित यंत्रणेला दिल्या. यावेळी हवेली पंचायत समितीचे सभापती युवराज काकडे, राष्ट्रवादी काँग्रेसचे तालुकाध्यक्ष दिलीप वाल्हेकर, कृषी उत्पन्न बाजार समितीचे उपसभापती शशिकांत गायकवाड, माजी सरपंच नंदू पाटील काळभोर यांच्यासह पदाधिकारी व ग्रामस्थ मोठ्या संख्येने उपस्थित होते.

उड्डाणपुलाची दुरुस्ती लवकरात लवकर पूर्ण करून सुरक्षित वाहतूक सुरू करावी, अशी मागणी स्थानिक नागरिकांनी केली. यावर आमदार ज्ञानेश्वर कटके यांनी नागरिकांच्या अडचणी लक्षात घेऊन कामात कोणतीही हयगय होणार नाही, तसेच काम वेळेत पूर्ण करण्यासाठी प्रशासनाला आवश्यक सूचना दिल्या असल्याचे सांगितले.

दरम्यान, सध्या पुलाला गेलेल्या तड्यांना आधार देण्यासाठी संरक्षण भिंतीचे काम सुरू आहे. पावसाळा संपल्यानंतर दुसर्‍या टप्प्यात पुलाच्या मुख्य दुरुस्तीचे काम हाती घेण्यात येणार आहे. या कामात थेऊरकडील बाजूचा तडा गेलेला भाग काढून नव्याने बांधण्यात येणार आहे. त्यावेळी काही काळासाठी पूल वाहतुकीसाठी बंद ठेवावा लागणार असल्याची माहिती पंचायत समितीचे सभापती युवराज काकडे यांनी दिली.