नवी दिल्ली  – हिंडेनबर्ग रिसर्च या संस्थेने भारतातील अदानी उद्योग समूहाविरुद्ध बरेच आरोप केले होते. त्याचबरोबर जगातील इतर कंपन्या विरोधातही अनियमित कामकाजाचे आरोप केले होते. मात्र अचानक हिंडेनबर्गने आपले काम थांबविले आहे. या सदर्भात त्यांच्याशी वृत्त संस्थांनी विचारणा केली असता आपण कोणाच्याही धमकीमुळे किंवा चौकशीमुळे कंपनीचे कामकाज थांबविलेले नाही, या भूमिकेचा नॅथन अँडरसन यांनी पुनरुच्चार केला आहे.

गेल्या अनेक वर्षापासून हिंडेनबर्ग समूहावर अनेक आरोप झाले आहेत. त्या आरोपाविरुद्ध ह्या समूहाने लढा दिलेला आहे. मात्र आम्ही स्वतंत्रपणे काम करतो. आम्ही कोणाच्या इशार्‍यावरून काम करत नाही असे त्यांनी सांगितले. या कंपनीविरोधात अमेरिकेतील न्यायव्यवस्था आणि रोखे बाजार नियंत्रण व्यवस्थेने चौकशी सुरू केले असल्याचे बोलले जात आहे. मात्र आतापर्यत आमची कोणाकडून कसलीही चौकशी सुरू असल्याचे आमच्या समोर आलेले नाही असे त्यानी स्पष्ट केले.

आरोपाबाबत ठाम –
अदानीसंदर्भात आरोप केल्यानंतर अदानी समूहाचे शेअर बाजारात बरेच नुकसान झाले होते. मात्र आता हा घसारा बराच कमी झाला आहे. आता हिंडेनबर्गने काम थांबविलेले आहे. अशा परिस्थितीत पूर्वी केलेले आरोप योग्य आहेत की अयोग्य असे विचारले असता अ‍ॅँन्डरसन यांनी आम्ही आमच्या आरोपावर ठाम असल्याचे सांगितले आहे. मात्र त्याचा पाठपुरावा करण्यात येणार नसल्याचे त्यांनी सुचित केले. आम्ही संशोधन करून आरोप केले होते. त्या संदर्भातील पुरावा दिला असल्याचे त्यांचे म्हणणे आहे. मात्र अदानी समुहाने त्यांच्यावरील सर्व आरोप फेटाळलेले आहेत.

इतर कोणाशी संगनमत नाही –
भारतीय हितसंबंधाविरोधात काम करणारे जॉर्ज सोरोस आणि इतर संस्थांशी संगनमताने हिंडेनबर्ग समूहाने काम करून अदानी उद्योग समूहाविरोधात आरोप केले असे बोलले जाते. या बाबीकडे लक्ष वेधले असता अँडरसन यांनी सांगितले की आम्ही स्वतःचे संशोधन स्वतः करतो. आम्ही कुणाशीही संगनमत करून असे काम करत नाही. कारण आमचा आमच्या संशोधनावर विश्वास असतो.

इतर कोणाकडे काम का सोपविले नाही –
हिंडेनबर्ग रिसर्चने गेल्या काही वर्षात देश- विदेशातील कंपन्यांच्या विरोधात आरोप केले आहेत. त्या संदर्भात संशोधन केले आहे. अशा परिस्थितीत कंपनी पूर्णपणे बंद करण्याचे ऐवजी आपल्या इतर सहकार्‍याकडे या कंपनीचे कामकाज का सोपविले नाही असे विचारले असता अँडरसन यांनी सांगितले की, या कंपनीचे नाव माझ्या नावाशी जोडले गेलेले आहे. त्यामुळे माझ्याशिवाय इतर कोणी हे काम करू शकेल असे आपल्याला वाटत नाही. त्यामुळे आपण ही कंपनी बंद करत आहोत. आपले वैयक्तिक जीवन अधिक आनंदाने घालविण्याचा प्रयत्न करणार आहोत.