Women’s T20 World Cup 2024 :  महिला क्रिकेटमध्ये टी ट्वेंटी विश्वचषक स्पर्धेला 3 ऑक्टोबरपासून दुबई आणि शारजाह इथं सुरुवात होणार आहे. आयसीसी अर्थात आंतरराष्ट्रीय क्रिकेट परिषदेनं नुकतीच विश्वचषकाच्या वेळापत्रकाची घोषणा केली आहे. महिला टी-20 विश्व करंडक स्पर्धेत भारताची सलामीची लढत न्यूझीलंड संघाबरोबर 4 ऑक्टोबर रोजी होणार आहे. त्यानंतर 6 ऑक्टोबर रोजी भारतीय संघ पाकिस्तान संघासोबत दोन हात करणार आहे. 9 ऑक्टोबर रोजी श्रीलंका व 13 ऑकटोबर रोजी ऑस्ट्रेलियाचे आव्हान भारताच्या महिला संघासमोर असणार आहे.

टी-20 विश्वचषकाच्या पार्श्वभूमीवर भारताने अलीकडेच महिला टी-20 विश्वचषक 2024 साठी संघ जाहीर केला आहे. टीम इंडियाने हरमनप्रीत कौरला कर्णधार बनवले आहे. भारताने अनुभवी खेळाडूंबरोबरच युवा खेळाडूंनाही संधी दिली आहे. हरमनप्रीतने टी-20 विश्वचषकापूर्वीच एक खास विक्रम आपल्या नावावर केला आहे. महिला टी-20 विश्वचषकाच्या चार आवृत्त्यांमध्ये कर्णधारपद भूषवणारी ती पहिली भारतीय खेळाडू ठरली आहे.

टीम इंडियाने 2018, 2020 आणि 2023 मध्ये हरमनप्रीतच्या नेतृत्वाखाली टी-20 विश्वचषक खेळला होता. आता 2024 मध्येही भारतीय संघ हरमनसोबत मैदानात उतरणार आहे. हरमनप्रीतसोबत भारताने स्मृती मानधना, दीप्ती शर्मा आणि पूजा वस्त्राकर यांचाही संघात समावेश करण्यात आला आहे. महिला टी-20 विश्वचषक 2024 येत्या 3 ऑक्टोबरपासून सुरू होणार आहे. स्पर्धेतील पहिला सामना बांगलादेश आणि स्कॉटलंड यांच्यात होणार आहे.

Asian Champions Trophy 2024 : भारतीय हॉकी संघाची घोषणा, ‘हे’ 18 खेळाडू चीनमध्ये दाखवतील आपली ताकद…

दरम्यान, महिला टी-20 विश्वकरंडक स्पर्धेत एकूण 10 संघ सहभागी होणार आहेत. या दहा संघांची विभागणी दोन गटांमध्ये करण्यात आली आहे. अ गटात भारतीय संघाचा समावेश करण्यात आला असून भारताच्या बरोबरीने न्यूझीलंड, पाकिस्तान, श्रीलंका व सहा वेळेस विजेतेपद पटकावणारा ऑस्ट्रेलिया संघ असणार आहे. ब गटात बांगलादेश, इंग्लंड, दक्षिण आफ्रिका, वेस्ट इंडिज व स्कॉटलंड या संघाचा समावेश करण्यात आला आहे.