नवी दिल्ली: पंतप्रधान नरेंद्र मोदी यांचे सोशल मीडिया अकाउंट आता महिला चालवणार आहेत. खुद्द पीएम मोदींनी यासंबंधीची घोषणा केली आहे. केवळ एका दिवसासाठी महिला त्यांचे अनुभव पीएम मोदींच्या अकाउंटवरून शेअर करणार आहेत. मन की बात कार्यक्रमात पंतप्रधान मोदी म्हणाले की, आंतरराष्ट्रीय महिला दिनी (8 मार्च) आहे. या दिवशी एक्स आणि इन्स्टाग्राम त्यांचे सोशल मीडिया अकाउंट वापरणार आहेत.

ही दोन सोशल मीडिया अकाउंट एका दिवसासाठी प्रेरणादायी महिलांच्या निवडक गटाकडे सोपवली जाणार आहेत. या काळात या महिला त्यांचे काम आणि अनुभव देशवासीयांशी शेअर करू शकतील. ‘मन की बात’च्या 119 व्या एपिसोडमध्ये पीएम मोदी म्हणाले, ‘यावेळी महिला दिनी मी एक पुढाकार घेणार आहे, जो आपल्या महिला शक्तीला समर्पित असेल. या विशेष प्रसंगी मी माझे एक्स आणि इन्स्टाग्रामसारखे सोशल मीडिया अकाउंट एका दिवसासाठी देशातील काही प्रेरणादायी महिलांना सुपूर्द करणार आहे.

या अकाउंटवर विविध क्षेत्रात महिलांनी केलेले काम आणि त्यांना मिळालेले यश ८ मार्च या दिवशी देशवासीयांना सांगणार आहेत. यासोबतच पीएम मोदी म्हणाले की, सोशल मीडिया प्लॅटफॉर्म जरी माझा असला तरी त्यांचे अनुभव, आव्हाने आणि यश यावर चर्चा केली जाईल. पंतप्रधान मोदींनी नमो ॲपद्वारे महिलांना या विशेष उपक्रमात सहभागी होण्यासाठी आमंत्रित केले आहे.

जर तुम्हाला ही संधी तुमच्यासाठी हवी असेल, तर नमो ॲपवर तयार केलेल्या विशेष प्लॅटफॉर्मद्वारे या प्रयोगाचा भाग व्हा आणि माझ्या एक्स आणि इन्स्टाग्राम खात्यांद्वारे तुमचा संदेश संपूर्ण जगापर्यंत पोहोचवा. या महिला दिनी, आपण महिलांच्या अदम्य सामर्थ्याचा सन्मान करू या, असे उद्धार मोदींनी मन की बातमध्ये काढले आहेत.