Pune Congress City President | नुकतेच काँग्रेस पक्षाचे महाराष्ट्र राज्याचे प्रदेशाध्यक्ष हर्षवर्धन सपकाळ हे पुणे आणि पिंपरी चिंचवड दौऱ्यावर आले होते. सपकाळ यांनी प्रदेशाध्यक्ष पदाची सूत्रे स्विकारल्यानंतर ते पहिल्यांदाच पुणे शहराच्या दौऱ्यावर आले होते. पुण्यातील काँग्रेस भवन येथे त्यांच्या नावाचे मोठे बॅनर्स कार्यकर्त्यांनी लावले होते. भवनात दाखल होत सपकाळ यांनी पक्षातील पदाधिकारी, कार्यकर्त्यांशी संवाद साधला. माध्यांनाही त्यांनी प्रतिक्रिया दिली. पक्षाची संघटनात्मक जबाबादारी सपकाळ यांच्यावर असल्याने ते पक्ष वाढीसाठी संघटन मजूबत करण्यावर भर देत आहेत. मात्र, असे असले तरी पक्षातील गटतट सुरूच असल्याचे चित्र आहे. सपकाळ हे पुणे दौऱ्यावर आले असताना पक्षातील कार्यकर्ते आणि पदाधिकाऱ्यांनी त्यांच्यापुढे तक्रारीचा पाढाचा वाचायला सुरुवात केली. मात्र प्रदेशाध्यक्ष सपकाळ यांनी मी काही सूचनापेटी नाही तक्रारी करू नका असं संबंधितांना सुनावले. यामुळे प्रदेशाध्यक्षांच्या दौऱ्यानिमित्त पुन्हा एकदा पुणे काँग्रेसमधील गटबाजी चव्हाट्यावर आल्याचे चित्र पाहायला मिळाले. येत्या काही महिन्यांवर स्थानिक स्वराज्य संस्थेच्या निवडणुका लागणार असल्याचे सांगितले जात आहे. या पार्श्वभूमीवर पुणे शहर काँग्रेस शहराध्यक्ष पदासाठी बदलाचे वारे वाहू लागले आहेत. या पदासाठी पक्षातीलच अनेक नावं चर्चेत आहेत. अनेकांची शिफारशी करण्यात येत असल्याचे देखील सांगितले जात आहे. पुण्यातील काँग्रेस पक्षात गेल्या काही काळापासून काही गट कार्यकर्ते आहेत. ज्यावेळी काँग्रेस पक्षाचे प्रदेशाध्यक्ष नाना पटोले होते. त्यावेळी म्हणजेच लोकसभा निवडणुकीपूर्वी पटोले यांच्याकडे शहराध्यक्ष बदलण्याची मागणी करण्यात आली होती. त्या मागणीला यश न आल्याने थेट दिल्लीतून या गटाने शहराध्यक्ष बदलाबाबात मागणी केली. मात्र त्या मागणीला प्रतिसाद मिळाला नाही. काँग्रेस पक्षात अनेक मोठे बदल करण्यात आले असून पक्षातील इतर नेत्यांंना विविध पदांची जबाबदारी सोपण्यात आली आहे. महाराष्ट्रातही विदर्भातील चेहऱ्याला प्रदेशाध्यक्ष पद देण्यात आले आहे. त्यामुळे पुण्यातील काँग्रेसच्या शहराध्यक्ष बदलाबाबत पुन्हा एकदा फिल्डिंग सुरू झाली आहे. पुणे शहरामध्ये काँग्रेस शहराध्यक्ष म्हणून अरविंद शिंदे हे कार्यरत आहेत. तब्बल चार वर्षापासून शिंदे हे शहराध्यक्ष आहेत. यामुळे काँग्रेस पक्ष पुण्यातील पक्षातील पदे आणि शहराध्यक्ष पदाबाबात काही मोठा निर्णय घेणार का हे पाहणे महत्वाचे असणार आहे. ही नावं चर्चेत अरविंद शिंदे, अजित दरेकर, माजी नगरसेवक, अविनाश बागवे, सुनील मुदगल, विरेंद्र किराड, गोपाळ तिवारी, संजय बालगुडे ही नावे शहराध्यक्ष पदासाठी आहेत.
