Operation Tiger:  शिंदे सेनेच्या ‘ऑपरेशन टायगर’मुळे ठाकरे सेनेला खिंडार पडले आहे. काही दिवसांपूर्वी शिंदे गटाने 6 खासदार फोडले. आता खासदारानंतर आमदार देखील फुटणार असल्याचा दावा करण्यात आला आहे.

शिंदे गटाच्या आमदाराने केलेल्या दाव्याने राजकीय वर्तुळात चर्चांना उधाण आले आहे. उद्धव ठाकरेंच्या शिवसेनेतील (UBT) २० पैकी १४ आमदार एकनाथ शिंदेंच्या शिवसेनेत प्रवेश करण्याच्या तयारीत असल्याची चर्चा रंगली आहे.

मंत्री गुलाबराव पाटील यांनी ठाकरे सेनेतील १४ आमदारांच्या पक्षांतराबाबत जाहीर वक्तव्य केले.”थोडा वेळ थांबा, १४ पेक्षा जास्त आमदार एकनाथ शिंदेंकडे येतील.एकनाथ शिंदे बोलत नाहीत, ते फक्त आपल्या दाढीवरून हात फिरवतात, हे आदित्य ठाकरेंनी कबूल केले आहे. जेव्हा एकनाथ शिंदे दाढीवरून हात फिरवतील, तेव्हा ऑपरेशन टायगर यशस्वी झालेलं असेल,” असे सूचक वक्तव्य गुलाबराव पाटील यांनी केले होते.

यानंतर आता शिंदेसेनेचे आमदार मुरजी पटेल यांनीही ठाकरे गटाचे 14 आमदार शिंदे गटाच्या संपर्कात असून हे आमदार लवकरच शिंदे गटात प्रवेश करतील, असा दावा मुरजी पटेल यांनी केला आहे. आमदारांनंतर ठाकरे गटातील नगरसेवक देखील शिंदे गटात प्रवेश करणार असल्याचे संकेत दिले आहेत.

ठाकरे गटाचं टेन्शन वाढल्याची चर्चा

मुरजी पटेल यांच्या वक्तव्याने ठाकरे गटाचं टेन्शन वाढल्याची चर्चा आहे. काही महिन्याआधीच ठाकरेंना खासदारांच्या बंडखोरीचा धक्का बसला आहे. लोकसभा खासदारांची शिंदेंना साथ दिल्याने राष्ट्रीय पातळीवर एकच खळबळ उडाली होती. त्यांच्या पक्षप्रवेशाला कोणतीही आडकाठी आली नसल्याचेही दिसून आले. आता आमदार जाणार असल्याच्या चर्चेने उधाण आले आहे.

१४ आमदारांमागची राजकीय रणनीती काय? 

ठाकरे गटाकडे विधानसभेत २० आमदार आहेत. त्यापैकी दोन-तृतीयांश म्हणजेच १४ आमदारांनी एकत्रितपणे पक्षांतर केल्यास विधिमंडळातील पक्षफुटीच्या नियमांच्या दृष्टीने वेगळे समीकरण तयार होऊ शकते, अशी चर्चा आहे. त्यामुळेच सध्या राजकीय वर्तुळात १४ आमदारांच्या संभाव्य पक्षांतराची चर्चा सुरू आहे. विशेष म्हणजे शिंदेंनी काही आमदारांच्या अज्ञात ठिकाणी भेटी घेतल्याच्या देखील चर्चा आहे. अलीकडेच महाविकास आघाडीने आमदारांची बैठक बोलावली होती. त्यातील 60 पैकी 37 आमदारांनीच उपस्थिती दर्शवली होती. त्यामुळे चर्चांना अधिक उधाण आले आहे.

हेही वाचा: 

Top 15 News : ‘ऑपरेशन टायगर-4’ची तयारी?, मोदी आज मंत्र्यांची घेणार ‘क्लास’ आणि बिग बॉस 20’चा ग्रँड प्रीमिअर दणक्यात , वाचा टॉप १५ बातम्या