बंगळूर : कर्नाटकात सध्या वेगळ्याच चर्चांनी जोर धरला आहे. माजी मुख्यमंत्री एच.डी.कुमारस्वामी यांनी सध्याचे मुख्यमंत्री  सिद्धरामय्या यांना एकेकाळी भाजपमध्ये यायचे होते असे वक्तव्य केल्याने राजकीय वातावरण ढवळून निघाले आहे. त्यातच या वक्तव्याचा सिद्धरामय्या यांनी समाचार घेत कुमारस्वामी यांना उत्तर दिले आहे.

मुख्यमंत्री  सिद्धरामय्या यांनी याविषयी म्हैसूर विमानतळावर प्रसारमाध्यमांशी प्रतिक्रिया दिली. “आयुष्याच्या शेवटपर्यंत भाजपमध्ये जाणार नाही, असे स्पष्टीकरण  दिले आहे. पुढे बोलताना त्यांनी,‘‘माझी संपूर्ण राजकीय कारकीर्द जातीयवादी शक्तींविरोधात गेली आहे. त्यामुळे माजी मुख्यमंत्री एच. डी. कुमारस्वामी यांचे याबाबतीतचे विधान मजेदार आहे.’’ असे म्हणत त्यांची खिल्ली उडवली.

सिद्धरामय्या यांना एकदा भाजपमध्ये जायचे होते आणि या संदर्भात त्यांनी भाजपच्या राष्ट्रीय नेत्यांची भेट घेतली होती, या कुमारस्वामींच्या  विधानावर बोलताना सिद्धरामय्या म्हणाले,‘‘भाजपमध्ये जाईन यावर कोणाचा विश्वास बसेल का? आम्ही काही भाजप नेत्यांना वेगवेगळ्या परिस्थितीत भेटलो असेनही. याचा अर्थ त्यांच्या पक्षात जाईन असे होत नाही, असेही स्पष्टीकरण त्यांनी यावेळी दिले.

त्यासोबतच नुकतीच मी केंद्रीय गृहमंत्री अमित शहा यांची भेट घेतली. यापूर्वी मी लालकृष्ण अडवाणींनाही भेटलो होतो.’’ सिद्धरामय्या म्हणाले, ‘‘पुढील मंत्रिमंडळ बैठकीत दुष्काळग्रस्त तालुक्यांची यादी जाहीर केली जाईल. ६२ तालुके आधीच निकषांनुसार घोषणेसाठी पात्र आहेत. आणखी १३६ तालुकेही दुष्काळाच्या सावटाखाली आहेत. आम्ही अधिकाऱ्यांकडून अहवाल मागवला आहे, असेही त्यांनी स्पष्ट केले.