Dhule News : धुळे शहरालगतच्या वरखेडी शिवारात जंगली जनावरांनी शेतात धुमाकूळ घातल्याने शेतकरी महेंद्र खैरनार यांचे तीन एकरांवरील मक्याचे पीक उद्ध्वस्त झाले आहे. काढणीला आलेले पीक रानडुक्कर, हरीण आणि नीलगायांसह इतर जंगली प्राण्यांनी अक्षरशः जमीनदोस्त केल्याने शेतकऱ्याच्या मेहनतीवर पाणी फेरले आहे.

महेंद्र खैरनार यांनी तीन एकर क्षेत्रावर मक्याची लागवड केली होती. पीक जोमात आल्याने काढणीच्या वेळी चांगले उत्पन्न मिळण्याची अपेक्षा होती. मात्र, गेल्या महिनाभरापासून परिसरात जंगली प्राण्यांचा वावर वाढला असून, रात्रीच्या वेळी हे प्राणी शेतात घुसून उभ्या पिकाची मोठ्या प्रमाणात नासधूस करत आहेत.

जंगली प्राण्यांनी केलेल्या नुकसानीमुळे तीन एकरांवरील मका जमीनदोस्त झाला असून, शेतकऱ्यावर मोठे आर्थिक संकट ओढवले आहे. पिकासाठी केलेला खर्च आणि हातातोंडाशी आलेले पीक दोन्ही वाया गेल्याने शेतकरी हवालदिल झाला आहे.

जंगली प्राण्यांचा तातडीने बंदोबस्त करून झालेल्या नुकसानीची भरपाई द्यावी, अशी मागणी महेंद्र खैरनार यांनी वन विभाग आणि कृषी विभागाकडे केली आहे.

हेही वाचा: 

Dahihandi 2026 : गोविंदा रे गोपाळा…!!! राज्यभरात दहीहंडीचा उत्साह; मुंबईत नागरिकांचा मोठा जल्लोष