पुणे : पुण्यातील कुख्यात गुंड निलेश घायवळ पुन्हा एकदा चर्चेच्या केंद्रस्थानी आहे. कोथरूडमधील गोळीबार प्रकरणात मकोका कायद्यांतर्गत कारवाई झाल्यानंतर तो पोलिसांना चकवा देऊन परदेशात पळून गेल्याची धक्कादायक बाब उघड झाली आहे. बनावट कागदपत्रे आणि नाव बदलून त्याने पासपोर्ट मिळवला, आणि आता तो स्वित्झर्लंडमध्ये लपल्याची माहिती पोलिसांना मिळाली आहे. दरम्यान, निलेश घायवळचे एक-एक कारनामे आता समोर येत आहेत. धाराशिवमधील एका व्यावसायिकाला कॉल करुन धमकी दिल्याचा व्हिडिओ सध्या सोशल मीडियावर व्हायरल होत आहे. या कॉलमध्ये घायवाळने आमदार तानाजी सावंत यांचे नाव घेऊन धमकावले असून, “तानाजी सावंतला मध्ये का घेतोस? मी घरी येतो नाहीतर तू घरी ये…” अशी शिवीगाळ करत धाराशिवमधील धंदे बंद करण्याची धमकी दिली आहे. या व्हिडिओमुळे राजकीय नेत्यांच्या गुंडांशी साटेलोट्यावर प्रश्नचिन्ह उपस्थित झाले आहे. तानाजी सावंतला मध्ये का घेतोस? धाराशिवमधील एका व्यावसायिक ‘दिनेश’ याला घायवाळने व्हाट्सअॅप कॉल केला. याचा व्हिडिओ रेकॉर्ड करून सोशल मीडियावर शेअर करण्यात आला आहे. कॉलमध्ये दिनेशने कदाचित तानाजी सावंत यांचे नाव घेतले असावे, त्यावर घायवाळने संताप व्यक्त करत म्हटले, “आत्ता या परिस्थितीत तानाजी सावंतला मध्ये का घेतोस? … मी घरी येतो नाहीतर तू घरी ये… शिवीगाळ करत तू इकडे धंदा करायचा नाही, पुण्यात जाऊन धंदे कर तुझे पुण्यातील धंदे बंद करतो.” दुकाने बंद करण्याची धमकी या धमकीत घायवाळने स्पष्टपणे सावंत यांचे नाव घेऊन व्यावसायिकाला इशारा दिला असून, त्याच्या दुकाने बंद करण्याची धमकी दिली आहे. नेमका हा ‘दिनेश’ कोण आहे, याबाबत अधिकृत माहिती अद्याप समोर आलेली नाही, पण व्हिडिओ व्हायरल झाल्याने धाराशिव पोलिसांकडे तक्रारी दाखल होण्याची शक्यता आहे. हा व्हिडिओ सोशल मीडियावर तुफान व्हायरल होत असून, नेटकऱ्यांनी घायवाळच्या गुन्हेगारी नेटवर्कवर आणि राजकीय संरक्षणावर सवाल उपस्थित केले आहेत.
