मुंबई । राज्याचे अर्थमंत्री अजित पवार यांनी मुख्यमंत्री माझी लाडकी बहिण योजनेची घोषणा केली. या योजनेअंतर्गत २१ ते ६० वयोगटातील महिलांना सरकार दरमहा १ हजार ५०० रुपये देणार आहे. ह्या योजनेची सध्या मोठ्या प्रमाणात चर्चा असतांना या योजनेवरुन महायुती सरकारमध्ये श्रेयवाद सुरु झाला आहे.

विधानसभा निवडणुकीआधी महायुती सरकाराने अनेक योजनांची घोषणा केली. या सरकारमधील घटक पक्ष भाजप, शिंदे गट आणि अजित पवार गटाकडून लाडकी बहीण योजनेचा सर्वत्र प्रचारही सुरु आहे. या योजनेचा फायदा विधान सभा निवडणुकीत नक्कीच महायुती सरकारला होणार असल्याची शक्यताही राजकीय विश्लेषकांकडून केली जात असता आता महायुतीतील घटक पक्षामध्ये श्रेयवाद सुरु झाल्याचे दिसून येत आहे. याचे उदाहरण राज्यातील अनेक ठिकाणी जाहिरातीच्या माध्यमांतून पाहायला मिळत आहे.

अजित दादांनी दिले लाडक्या बहिणींना बळ,
लाडकी बहीण योजनेतून मिळाला बहिणींना लाभ!

या योजनेच्या अधिक माहितीसाठी ‘महाराष्ट्रवादी हेल्पलाइन ९८६१७१७१७१’ वर व्हाट्सअप करा.
खालील लिंकवर क्लिक करा.
https://t.co/jVBSJHDmDF#MahaRashtrawadiHelpline#महाराष्ट्रवादी_हेल्पलाइन… pic.twitter.com/YoXNpVwTHK

— MahaNCPspeaks (@mahancpspeaks) September 4, 2024

 

उपमुख्यमंत्री अजित पवार यांनी प्रसिद्ध केलेल्या एका व्हिडिओवरुन लाडकी बहीण नक्की कोणाची असा प्रश्न उपस्थित केला आहे. व्हिडिओमध्ये ‘दादाचा वादा’, ‘अजितदादांची लाडकी बहीण योजना’, ‘माझ्या अजितदादाने पैसे पाठवले’ असे संवाद या जाहिरातींमध्ये पाहायला व ऐकायला मिळत आहेत. “महिलांच्या बँक खात्यात येणारे १५०० रुपये ही भेट नाही तर माझ्या दादाचं प्रेम आहे. महिलांच्या स्वप्नांच्या उड्डाणातील छोटा पंख आहे आणि दादा तर एकच आहे. ही दादांची लाडकी बहीण योजना आहे”,असे या जाहिरातीमध्ये सांगण्यात व लिहिण्यात आले आहे. त्यामुळे ही योजना नक्की मुख्यमंत्री शिंदेंची की उपमुख्यमंत्री तथा अर्थमंत्री अजित पवार यांची असा श्रेयवादाचा प्रश्न समोर येत आहे.

हा व्हिडिओ अजित पवार यांच्या ऑफिशियल पेजवर माझी लाडकी बहीण योजनेची जाहिरात प्रसिद्ध करण्यात आली आहे. राज्य सरकारच्या या योजनेचे नाव मुख्यमंत्री माझी लाडकी बहीण योजना असे आहे. मात्र अजित पवारांच्या व्हिडिओमध्ये मुख्यमंत्री शब्द वगळण्यात आला आहे.

तर दुसरीकडे साताऱ्यात याच योजनेचे बॅनर्स सध्या चांगलेच चर्चेत आले आहे. ज्या अर्थमंत्री तथा उपमुख्यमंत्री अजित पवार यांनी अंतरीम अर्थसंकल्पामध्ये लाडकी बहिण योजनेची घोषणा केली त्यांचाच फोटो सातारा शहरातील पोवई नाक्यावर लावण्यात आलेल्या लाडकी बहीण योजनेची जाहिरात करणाऱ्या होर्डिगवरून अजित पवार यांचा फोटो गायब असल्याचे समोर आले आहे.

साताऱ्यातील पोवई नाक्यावरील महायुती सरकारकडून नुकताच एक लाडकी बहिण योजनेचे होर्डिंग लावण्यात आले आहे. या होर्डिंगवर पंतप्रधान नरेंद्र मोदी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचा फोटो दिसत आहे. मात्र, या होर्डिंगवर फडणवीस समर्थकांनी अजित पवार यांचा फोटो लावला नसल्याने याची चांगलीच चर्चा सद्या सर्वत्र सुरू आहे. अजित पवार यांच्या व्हिडिओवर शिंदे गटाच्या नेत्यांकडून संताप वव्यक्त केला जात आहे तर दुसरीकडे अजित पवार गटाच्या नेत्यांकडून भाजप साताऱ्यातील बॅनरवरून टीका केली जात आहे. दरम्यान विधान सभा निवडणुकीच्या तोंडावर महायुतीला श्रेयवाद थांबणार की वाढणार यामुळे येत्या विधानसभा निडवणुकीत याचे काय परिणाम दिसणार याकडे सर्वांचे लक्ष लागले आहे.
० ० ० ० ० ० ० ० ० ० ० ० ० ० ० ० ० ० ०