PSI Gopal Badne : सातारा जिल्ह्यातील फलटण उपजिल्हा रुग्णालयात वैद्यकीय अधिकारी म्हणून कार्यरत असलेल्या २८ वर्षीय डॉ. संपदा मुंडे यांनी गुरुवारी (२३ ऑक्टोबर) रात्री फलटणमधील एका हॉटेलच्या खोलीत जीवन संपवलं. या घटनेने राज्यभरात खळबळ उडाली असून, डॉ. मुंडे यांच्या डाव्या हाताच्या तळव्यावर पेनाने लिहिलेल्या सुसाईड नोटमध्ये धक्कादायक आरोप समोर आले आहेत.

नोटमध्ये त्यांनी पोलिस उपनिरीक्षक (PSI) गोपाल बदने याने चार वेळा अत्याचार केला असा उल्लेख केला आहे, तसेच पोलिस कर्मचारी प्रशांत बनकर याने गेल्या चार महिन्यांपासून शारीरिक आणि मानसिक छळ केल्याचा आरोप केला आहे.

या प्रकरणामुळे फलटणमधील वैद्यकीय आणि पोलिस वर्तुळात संतापाची लाट उसळली असून, मुख्यमंत्री देवेंद्र फडणवीस यांनी तात्काळ कारवाईचे आदेश दिले आहेत. PSI गोपाल बदने याला निलंबित करण्यात आले असून, त्याच्यासह बनकर यांच्यावर गुन्हा दाखल करण्यात आला आहे.

सुसाईड नोटमधील धक्कादायक मजकूर

डॉ. मुंडे यांच्या हातावर लिहिलेल्या नोटमध्ये स्पष्टपणे म्हटले आहे: “पोलिस निरीक्षक गोपाल बदने हा माझ्या मृत्यूचे कारण आहे. त्याने माझ्यावर चार वेळा बलात्कार केला. पाच महिन्यांपासून त्याने माझा बलात्कार, मानसिक आणि शारीरिक छळ केला.” कुटुंबीयांच्या मते, डॉ. मुंडे यांच्यावर पोस्टमॉर्टम अहवाल बदलण्याचा आणि चुकीचे फिटनेस प्रमाणपत्रे देण्याचा दबाव होता, ज्यामुळे त्या प्रचंड मानसिक तणावाखाली होत्या.

कोण आहेत PSI गोपाल बदने?

PSI गोपाल बदने हे फलटण ग्रामीण पोलीस विभागात उपनिरीक्षक म्हणून कार्यरत होते. उपलब्ध माहितीनुसार, ते फलटण पोलीस स्टेशनशी संबंधित असून, स्थानिक पातळीवर विविध गुन्ह्यांच्या तपासात सहभागी होते. डॉ. मुंडे यांच्या जून १९ रोजी DSP फलटण यांना लिहिलेल्या पत्रात बदने यांच्यासह उपविभागीय पोलिस निरीक्षक पाटील यांच्यावर छळाचा आरोप होता.

पत्रात त्यांनी म्हटले होते की, “मला प्रचंड मानसिक तणाव होत आहे, कृपया या प्रकरणाची चौकशी करा आणि दोषींवर कारवाई करा.” मात्र, या पत्रावर कोणतीही ठोस कारवाई झाली नाही, यामुळे प्रकरण अधिक गंभीर झाले.

बदने यांच्याबाबत सोशल मीडियावर आणि स्थानिक चर्चांमध्ये ते “प्रभावशाली” म्हणून ओळखले जातात, पण त्यांचे राजकीय संबंध असल्याचे कोणतेही ठोस पुरावे समोर आलेले नाहीत. घटनेनंतर ते फरार झाले असून, सातारा पोलिसांनी विशेष पथक पाठवून त्यांची शोध मोहीम सुरू केली आहे.