सातारा : मागच्या काही दिवसांपासून चर्चेत असलेल्या साताऱ्यातील महिला डॉक्टराच्या आत्महत्येनंतर महाराष्ट्रातील राजकीय वातावरण मोठ्या प्रमाणात तापले आहे. या प्रकरणात महिलांच्या न्यायासाठी आवाज उठवावा त्या महिला आयोगाच्या अध्यक्षा रुपाली चाकणकरांनी मात्र पीडितेलाच आरोपीच्या पिंजऱ्यात उभं केलं. यानंतर विरोधकांनी जोरदार टीका करून चाकणकरांच्या या भूमिकेवर संताप व्यक्त केला. पीडित तरुणीच्या वडिलांनी देखील रुपाली चाकणकरांच्या वक्तव्यावर आक्षेप वक्तव्य त्यांची उपमुख्यमंत्री अजित पवारांकडे तक्रार केली. आज उपमुख्यमंत्री अजित पवार यांनी महिला डॉक्टरच्या कुटुंबीयांशी फोनवरून संवाद साधला. या वेळी कुटुंबीयांनी अजित पवारांकडे महिला आयोगाचे अध्यक्ष रूपाली चाकणकर यांच्या भूमिकेविषयी नाराजी व्यक्त केली. त्यावेळी अजित पवारांनी याबाबत मी त्यांना विचारणार असल्याचे सांगितले. तसेच मुख्यमंत्र्यांशी देखील या प्रश्नावर चर्चा करण्याचे आश्वासन कुटुंबीयांना दिले. नेमके काय म्हणाले अजित पवार? रूपाली चाकणकर यांच्या मताशी आम्ही सहमत नाहीत. या संदर्भात आम्ही- रूपाली चाकणकर यांना विचारणा करणार आहे. त्यांच्या मताचे कोणीही आम्ही समर्थन करनार नाही. तसेच त्यांनी असं का केलं याचा जाबदेखील विचार असल्याचे अजित पवार यावेळी म्हणाले. चाकणकरांच्या भूमिकेवर सवाल फलटणधील डॉक्टर तरुणीनं आत्महत्येपूर्वी आपल्या तळहातावर आत्महत्येचं कारण लिहून ठेवलं होतं. पीएसआय गोपाळ बदनेनं चार वेळा बलात्कार केल्याचं त्यात उल्लेख आहे. तर प्रशांत बनकरनं मानसिक छळ केल्याचं तरुणीच्या हातावरील मजकुरात आढळून आलंय. या दाव्यानंतर विरोधकांनी चाकणकरांवर सडकून टीका केली. तसेच महिला आयोगाच्या भूमिकेवर सवाल उपस्थित केले. मृत्यूनंतर त्या मुलीचं आयोगाकडून चारित्र्यहनन का ?पोलीस यंत्रणेवर संशय असताना त्यांनी दिलेले पुरावे का ग्राह्य धरावेत ? असे सवालदेखील विरोधकांडून विचारले जात आहेत. चाकणकर पुन्हा विरोधकांच्या निशाण्यावर महिला आयोगाच्या अध्यक्षा रुपाली चाकणकरांना यापूर्वीही टीकेचं धनी व्हावं लागलं आहे. वैष्णवी हगवणे, तनिषा भिसे प्रकरणातही विरोधकांनी त्यांच्या भूमिकेवर सवाल उपस्थित केला होता. आता फलटण प्रकरणातही त्या विरोधकांच्या निशाण्यावर आल्या आहेत.
