Wayanad Lok Sabha by elections: भारतीय जनता पक्षाने (भाजप) केरळमधील वायनाड लोकसभा जागेवरील पोटनिवडणुकीसाठी नव्या हरिदास यांना उमेदवार म्हणून घोषित केले आहे. या जागेवर भाजपच्या नव्या यांचा सामना काँग्रेसच्या ज्येष्ठ नेत्या प्रियांका गांधी वाड्रा यांच्याशी होणार आहे. भारतीय निवडणूक आयोगाने (ECI) मंगळवारी पोटनिवडणुकीची तारीख जाहीर केली. 13 नोव्हेंबरला मतदान होणार असून 23 नोव्हेंबरला निकाल जाहीर होणार आहे.

नव्या हरिदास या एक यांत्रिक अभियंता आहेत. त्यांनी 2007 मध्ये KMCT अभियांत्रिकी महाविद्यालय, कालिकत विद्यापीठातून बी.टेक पदवी प्राप्त केली. असोसिएशन फॉर डेमोक्रॅटिक रिफॉर्म्स (ADR) नुसार, नव्या यांच्यावर कोणतेही गुन्हेगारी प्रकरण नाहीत आणि त्यांची मालमत्ता 1,29,56,264 रुपये आहे. एडीआरनुसार, त्यांच्यावर एकूण 1,64,978 रुपयांचे कर्ज आहे. त्यांच्या ट्विटर प्रोफाइलनुसार, त्या कोझिकोड कॉर्पोरेशनमध्ये नगरसेवक आहेत आणि सध्या भाजप महिला मोर्चाच्या प्रदेश सरचिटणीस आहेत. त्यांच्या फेसबुक पेजवर, त्यांनी स्वतःचे वर्णन भाजप संसदीय पक्षाच्या नेत्या आणि बीजेएमएमचे राज्य सरचिटणीस म्हणून केले आहे.

राहुल गांधी यांच्या राजीनाम्यामुळे रिक्त झालेल्या वायनाड मतदारसंघातून प्रियांका गांधी निवडणूक लढवणार असल्याची घोषणा काँग्रेस पक्षाने जूनमध्येच केली होती. 2024 च्या लोकसभा निवडणुकीनंतर जूनमध्ये, काँग्रेसने घोषणा केली होती की राहुल गांधी उत्तर प्रदेशातील रायबरेली लोकसभा मतदारसंघ ठेवतील आणि केरळमधील वायनाड जागा सोडतील, जिथून त्यांची बहीण प्रियंका गांधी निवडणूक लढवतील.

यावेळची वायनाड लोकसभा मतदारसंघाची निवडणूक अत्यंत महत्त्वाची मानली जात आहे, कारण काँग्रेससाठी प्रियंका गांधी वड्रा हा एक महत्त्वाचा चेहरा आहे आणि नव्या हरिदास हा भाजपसाठी तरुण आणि उत्साही पर्याय मानला जात आहे. झारखंड विधानसभेसाठी पहिल्या टप्प्यातील मतदानासोबतच वायनाड संसदीय जागा आणि झारखंडमधील विधानसभेच्या 47 जागांसाठी 13 नोव्हेंबर रोजी पोटनिवडणूक होणार आहे. वायनाड लोकसभा पोटनिवडणुकीचा निकाल 23 नोव्हेंबरला लागणार आहे.

भाजपने नव्या हरिदास यांना उमेदवार करून तरुण मतदारांना आकर्षित करण्याचा प्रयत्न केला आहे. तरुण आणि महिलांच्या प्रश्नांवर निवडणूक लढवणाऱ्या आणि सशक्त महिला नेत्या म्हणून नव्या यांना पक्षाने सादर केले आहे. दुसरीकडे, प्रियांका गांधी वढेरा काँग्रेसच्या मजबूत उमेदवार म्हणून रिंगणात आहेत, ज्या दीर्घकाळापासून पक्षाचा लोकप्रिय चेहरा आहेत.

दरम्यान, राज्याच्या सत्ताधारी एलडीएफने वायनाड लोकसभा पोटनिवडणुकीसाठी सीपीआयचे ज्येष्ठ नेते सत्यन मोकेरी यांना उमेदवारी दिली आहे. कोझिकोड जिल्ह्यातील नादापुरम मतदारसंघातील माजी आमदार मोकेरी हे कृषी क्षेत्रातील समस्या सोडवण्याच्या कामासाठी ओळखले जातात. त्यांनी 2014 मध्ये वायनाडमधून लोकसभा निवडणूक लढवली, जिथे ते काँग्रेस उमेदवार एमआय शानवास यांच्याकडून पराभूत झाले होते.