बिजिंग – चीनमधील प्रयोगशाळेतून करोनाची बाधा झाली असल्याची मांडणी जागतिक आरोग्य संघटनेने फेटाळून लावली आहे. असे घडल्याची सुतराम शक्‍यता नसल्याचे सांगत हा विषाणू वटवाघळांतून माणसांत संक्रमित झाल्याची शक्‍यता व्यक्त केली आहे. संघटनेचा हा अहवाल असोसिएट प्रेसच्या हाती लागला आहे.

करोनाच्या अगदी निकटचा विषाणू वटवाघळांत आढळला आहे. मात्र, वटवाघळांत असणारा हा विषाणू आणि सार्स कोव्ह-2 यांच्यातील अंतर काही दशकांचे असावे. मात्र त्यांच्यातील संबंध अद्याप अस्पष्ट आहेत. पालींमध्ये अशा स्वरूपाचे विषाणू आढळले आहेत. मेंढी आणि मांजरांमध्येही अशा स्वरूपाचे विषाणू आढलले आहेत. तेसुध्दा यांचे वाहक असू शकतात, असे त्यात सुचवण्यात आले आहे.

गेल्या वर्षी जानेवारी आणि फेब्रुवारी महिन्याच्या पहिल्या आठवड्यात चीनमधील वुहान येथे करोनाचे बाधित मोठ्या संख्येने आढळले होते. तेथे जागतिक स्तरावरील तज्ज्ञांच्या पथकाने भेट दिली. या पथकाचे प्रमुख पिटर बेन इम्बारेक यांनी हा अहवाल पूर्ण झाल्याचे शुक्रवारी सांगितले होते. त्याची पडताळणी आणि अनुवादाचे काम सुरू आहे, असे ते म्हणाले होते. ते म्हणाले, येत्या काही दिवसांत ही सर्व प्रक्रिया आम्ही पूर्ण करू त्यानंतर जनतेसाठी तो खुला करू.

या साथीची सुरवात वुहानमधील सागरी खाद्य बाजारातून सुरू झाल्याचे नमूद केले आहे. त्यानुसार डिसेंबर 2019मध्ये येथे बाधित मोठ्या संख्येने आढळले होते. वुहान मार्केटमधील या साथीच्या आधीही करोनाची बाधा झाली असू शकते मात्र त्या घटना शोधता आल्या नाहीत. तसेच या मार्केटमधील साथीशी त्याचा संबंध असू शकतो, असे त्यात नमूद केले आहे.

वुहान बाजारपेठेतून ही साथ सुरू झाल्याचा ठाम निष्कर्ष अद्याप काढता येत नाही. अथवा या मार्केटमध्ये हा विषाणू कसा पोहोचला, याचा निश्‍कर्ष अद्याप निघालेला नाही, असे त्यात म्हटले आहे. त्या देशांत आलेल्या गोठवलेल्या अन्नांच्या पाकिटावर हे विषाणू आढळले. त्याच्या संपर्कात स्थानिक नागरिक आले, असेही त्यात म्हटले असून गोठवलेल्या पदार्थांच्या वाहतुकीतून हा सर्वत्र पसरला असावा. 

त्यापेक्षा मानवाकडून मानवाला संसर्ग पसरला असण्याची शक्‍यता कमी आहे, याबाबत तज्ज्ञांमध्ये एकमत आहे. 2019मध्ये या विषाणूचा संसर्ग फार झाला नव्हता त्यानंतर चीममध्ये गोठवलेल्या वस्तू हाताळताना सार्स – कोव्ह 2 चा फेरसंसर्ग झाल्याचे काही पुरावे आढळले आहेत, असेही या अहवालात नमूद केले आहे.