White House Dinner Shooting: व्हाइट हाऊस कॉरस्पॉन्डंट्स डिनरमध्ये झालेल्या गोळीबाराने जागतिक स्तरावर मोठ्या प्रमाणात खळबळ उडाली आहे.दरम्यान , या गोळीबानंतर अध्यक्ष डोनाल्ड ट्रम्प यांनी पत्रकारांशी संवाद साधला. यावेळी त्यांनी आपण सुरक्षित असल्याचे सांगितले.  त्यांनी सुरक्षा कर्मचाऱ्यांची प्रशंसा करत त्यांनी उत्कृष्ट काम केले असल्याचे म्हटले.

पत्रकार परिषदेत बोलताना ट्रम्प म्हणाले, “गोळीबारात एक सुरक्षा अधिकारी जखमी झाला, आणि बुलेटप्रूफ जॅकेटमुळे त्याचा जीव वाचला. सिक्रेट सर्व्हिसने शौर्य दाखवून एका हल्लेखोराला तात्काळ पकडले.”

अशा भ्याड कृत्यांमुळे आपण आपल्या ध्येयापासून परावृत्त होणार नाही, असे ट्रम्प यांनी स्पष्टपणे सांगितले. विशेषतः इराणचा उल्लेख करत ते म्हणाले, “ही घटना मला इराणविरुद्ध सुरू असलेले युद्ध जिंकण्यापासून रोखणार नाही.”

पत्रकार परिषदेदरम्यान, ट्रम्प यांनी वॉशिंग्टन हिल्टनमधील सुरक्षेवर प्रश्नचिन्ह उपस्थित केले आणि सांगितले की ती इमारत पूर्णपणे सुरक्षित नाही. भविष्यासाठी व्हाइट हाऊसमध्ये ‘ड्रोन-प्रूफ’ आणि ‘बुलेटप्रूफ’ काचेने सुसज्ज असलेली एक आधुनिक ‘वॉर रूम’ बांधण्याच्या गरजेवर त्यांनी भर दिला. इमारतीमधील कार्यक्रम रद्द करणार का, असे विचारले असता, ते स्पष्टपणे म्हणाले, “मी ते करू शकत नाही. आपल्याला लोकांमध्ये बाहेर जावेच लागेल.”

ट्रम्प म्हणाले, “सिक्रेट सर्व्हिसने ज्या वेगाने मला, मेलानिया आणि व्हान्स यांच्यासह इतरांना बाहेर काढले, ते कौतुकास्पद आहे. अटक करण्यात आलेला हल्लेखोर कॅलिफोर्नियाचा असून तो आजारी आहे. माझे सर्व कॅबिनेट सहकारी सुरक्षित आहेत.”

जखमी झालेल्या सिक्रेट सर्व्हिस अधिकाऱ्याचा उल्लेख करत ट्रम्प म्हणाले, “एका अधिकाऱ्याला गोळी लागली, पण त्याने एक उत्तम बुलेटप्रूफ जॅकेट घातल्यामुळे तो वाचला. त्याच्यावर अगदी जवळून एका शक्तिशाली बंदुकीने गोळी झाडण्यात आली होती, आणि त्या जॅकेटने आपले काम चोख बजावले. मी नुकतेच त्या अधिकाऱ्याशी बोललो, आणि त्याची प्रकृती ठीक आहे. हा कार्यक्रम अभिव्यक्ती स्वातंत्र्याला समर्पित होता, ज्याचा उद्देश दोन्ही पक्षांच्या सदस्यांना आणि पत्रकारांना एकत्र आणणे हा होता.”

यापूर्वी, ट्रम्प यांनी सोशल मीडियावर पोस्ट केले होते की, सुरक्षा यंत्रणांच्या विनंतीनुसार प्रोटोकॉलनुसार कार्यक्रमस्थळ तात्काळ रिकामे करण्यात आले. ट्रम्प यांनी सांगितले की ते, फर्स्ट लेडी मेलानिया ट्रम्प, उपराष्ट्रपती आणि त्यांच्या कॅबिनेटमधील सर्व सदस्य सुरक्षित आणि “उत्तम स्थितीत” आहेत. White House Dinner Shooting: 

ट्रम्प यांनी सोशल मीडियावर सिक्रेट सर्व्हिसच्या शौर्याची प्रशंसा केली आणि सांगितले की हल्लेखोराला पकडण्यात आले आहे. त्यांनी असेही जाहीर केले की, या घटनेमुळे पुढे ढकलण्यात आलेला हा कार्यक्रम पुढील ३० दिवसांत पुन्हा आयोजित केला जाईल. राष्ट्राध्यक्ष लवकरच व्हाईट हाऊसमधून या संपूर्ण घटनेवर एक सविस्तर पत्रकार परिषद घेतील.

‘नर्ड प्रॉम’ म्हणून ओळखला जाणारा हा कार्यक्रम ऐतिहासिक होता, कारण राष्ट्राध्यक्ष डोनाल्ड ट्रम्प यांनी त्यांच्या मागील कार्यकाळात अनेक वर्षे बहिष्कार टाकल्यानंतर पहिल्यांदाच त्यात सहभागी होण्याचा निर्णय घेतला.

कार्यक्रमापूर्वीचे वातावरण काहीसे तणावपूर्ण होते, कारण ट्रम्प यांच्या पत्रकार-विरोधी वक्तव्यांमुळे अनेक पत्रकार संघटनांनी या कार्यक्रमाला विरोध केला होता. तथापि, ही परंपरा पुन्हा सुरू करण्यासाठी वॉशिंग्टन हिल्टनच्या बॉलरूममध्ये सुमारे २,६०० पाहुणे (पत्रकार, हॉलिवूड तारे आणि राजकारण्यांसह) जमले होते. उपराष्ट्रपती जेडी व्हान्स आणि संरक्षण सचिव पीट हेगसेथ हे देखील ट्रम्प यांच्यासोबत मंचावर उपस्थित होते. White House Dinner Shooting: