Amol Mitkari : आधी असंवेदनशील वक्तव्य, नंतर स्पष्टीकरण; मिटकरी संतापले, आनंदराज आंबेडकर अजितदादांविषयी असं काय म्हणाले?
Amol Mitkari : राष्ट्रवादी काँग्रेसचे नेते अमोल मिटकरी यांनी सोशल मीडिया प्लॅटफॉर्म 'एक्स'वर पोस्ट करत या वक्तव्यावर संताप व्यक्त केला आहे.

Amol Mitkari : जालन्यात रिपब्लिकन सेनेचा २८ वा वर्धापन दिन सोहळा उत्साहात पार पडला. या कार्यक्रमाला रिपब्लिकन सेनेचे प्रमुख आनंदराज आंबेडकर यांच्यासह राज्यभरातून मोठ्या संख्येने पदाधिकारी आणि कार्यकर्ते उपस्थित होते.
मात्र, या कार्यक्रमात आनंदराज आंबेडकर यांनी दिवंगत उपमुख्यमंत्री अजित पवार यांच्याबाबत केलेल्या एका वक्तव्यामुळे नव्या वादाला तोंड फुटले आहे. राष्ट्रवादी काँग्रेसचे नेते अमोल मिटकरी यांनी सोशल मीडिया प्लॅटफॉर्म ‘एक्स’वर पोस्ट करत या वक्तव्यावर संताप व्यक्त केला आहे.
अजित पवारांबाबत नेमकं काय म्हणाले आनंदराज आंबेडकर?
वर्धापन दिनाच्या कार्यक्रमात बोलताना आनंदराज आंबेडकर यांनी पाणीप्रश्नावर भाष्य करताना अजित पवार यांचा उल्लेख केला. ते म्हणाले, “आपले राज्यकर्ते म्हणतात, ‘पाणी आडवा, पाणी जिरवा’; मात्र जिथे पाऊसच पडत नाही, तिथे तलाव भरण्यासाठी अजितदादांना आणायचं का?”
या वक्तव्यावरून वाद निर्माण झाल्यानंतर अखेर आनंदराज आंबेडकर यांनी आपली भूमिका स्पष्ट केली. अजित पवार यांनी यापूर्वी पाण्याच्या संदर्भात केलेल्या विधानाचा आपण उपरोधिक पद्धतीने उल्लेख केला होता, असे स्पष्टीकरण त्यांनी पत्रकारांशी बोलताना दिले.
अमोल मिटकरींचा आनंदराज आंबेडकरांना सवाल
आनंदराज आंबेडकर यांच्या वक्तव्यावर अमोल मिटकरी यांनी सोशल मीडियावर पोस्ट शेअर करत नाराजी व्यक्त केली. ते म्हणाले, “श्री. आनंदराज आंबेडकर यांनी लोकनेते अजितदादांबद्दल केलेले वक्तव्य दुर्दैवी आणि असंवेदनशील आहे. एखाद्या राजकीय नेत्याच्या विधानावर टीका करण्याचा प्रत्येकाला अधिकार आहे. मात्र, आज आपल्यात नसलेल्या व्यक्तीबद्दल बोलताना किमान संवेदनशीलता आणि सामाजिक भान राखले पाहिजे.”
श्री आनंदराज आंबेडकर यांनी लोकनेते अजितदादांबद्दल केलेले वक्तव्य दुर्दैवी आणि असंवेदनशील आहे.एखाद्या राजकीय नेत्याच्या विधानावर टीका करण्याचा प्रत्येकाला अधिकार आहे. मात्र, आज आपल्यात नसलेल्या व्यक्तीबद्दल बोलताना किमान संवेदनशीलता आणि सामाजिक भान राखले पाहिजे.
दादा केवळ एका पक्षाचे नेते नव्हते, तर महाराष्ट्राच्या राजकारणातील एक प्रभावी नेतृत्व होते. पाणी, सिंचन, शेती आणि ग्रामीण विकास या विषयांवर त्यांनी आयुष्यभर काम केले. त्यांच्या कामांवर मतभेद असू शकतात, त्यांच्या निर्णयांवर टीकाही होऊ शकते; परंतु अशा प्रकारे उपरोधिक टिप्पणी करणे ही महाराष्ट्राच्या राजकीय संस्कृतीला शोभणारी बाब नाही.
आनंदराज आंबेडकर यांनी हे वक्तव्य उपरोधाने केल्याचे स्पष्टीकरण दिले असले, तरी उपरोध आणि अवमान यातील सीमारेषा प्रत्येकाने ओळखली पाहिजे.
अजितदादा आज आपल्यात नाहीत, पण महाराष्ट्राच्या विकासातील त्यांचे योगदान आणि त्यांच्या कार्याचा ठसा कायम राहणार आहे. व्यक्ती जाते, पण तिचे कार्य बोलत राहते.त्यांच्या निर्णयांवर चर्चा करा; पण त्यांच्या निधनानंतर त्यांच्या नावाचा उपरोधिक वापर करून त्यांच्या स्मृतींचा अवमान करू नका.— आ. अमोल गोदावरी रामकृष्ण मिटकरी (@amolmitkari22) November 22, 2026
पुढे त्यांनी अजित पवार यांच्या राजकीय आणि सामाजिक कार्याचा उल्लेख केला. “दादा केवळ एका पक्षाचे नेते नव्हते, तर महाराष्ट्राच्या राजकारणातील एक प्रभावी नेतृत्व होते. पाणी, सिंचन, शेती आणि ग्रामीण विकास या विषयांवर त्यांनी आयुष्यभर काम केले. त्यांच्या कामांवर मतभेद असू शकतात, त्यांच्या निर्णयांवर टीकाही होऊ शकते; परंतु अशा प्रकारे उपरोधिक टिप्पणी करणे ही महाराष्ट्राच्या राजकीय संस्कृतीला शोभणारी बाब नाही,” असे मिटकरी यांनी म्हटले.
‘उपरोध आणि अवमान यातील सीमारेषा ओळखा!’
आनंदराज आंबेडकर यांनी आपले वक्तव्य उपरोधाने केल्याचे स्पष्टीकरण दिले असले, तरी उपरोध आणि अवमान यातील सीमारेषा प्रत्येकाने ओळखली पाहिजे, असेही अमोल मिटकरी यांनी आपल्या पोस्टमध्ये म्हटले आहे.
Drishyam 3: अजय देवगणचा ‘दृश्यम 3’ चित्रपट आता ओटीटीवर; ‘या’ दिवशी पाहता येणार





