आळेफाटा : चिल्हेवाडी धरणातील पाणी बंदिस्त पाइपलाइनद्वारे गुळुंचवाडीपर्यंत पोहोचवून परिसरातील शेतीला सिंचनासाठी पाणी उपलब्ध करून देण्याच्या महत्त्वाकांक्षी योजनेचे भवितव्य सध्या अधांतरी असल्याचे चित्र आहे. या योजनेचे पाणीपूजन दोन वर्षांपूर्वी जलसंपदामंत्री राधाकृष्ण विखे पाटील यांच्या हस्ते कोळवाडी येथे मोठ्या उत्साहात करण्यात आले होते. मात्र,दोन वर्षांचा कालावधी उलटूनही पाइपलाइनचे काम पूर्ण झालेले नसल्याने चिल्हेवाडी धरणाचे पाणी प्रत्यक्ष शेतकऱ्यांच्या शेतापर्यंत पोहोचणार तरी कधी,असा सवाल उपस्थित होत आहे.

चिल्हेवाडी धरणातील पाणी बंदिस्त पाइपलाइनद्वारे गुळुंचवाडी परिसरात आणण्याची योजना आखण्यात आली आहे. या योजनेमुळे गुळुंचवाडी,बेल्हे,राजुरी,आळे, गुंजाळवाडी तसेच परिसरातील अनेक गावांमधील शेतकऱ्यांना सिंचनासाठी पाणी उपलब्ध होण्याची अपेक्षा आहे. पाण्याची उपलब्धता झाल्यास शेतीला मोठा आधार मिळणार असून पावसावर अवलंबून असलेल्या शेतकऱ्यांना दिलासा मिळू शकतो.त्यामुळे या योजनेकडे परिसरातील शेतकरी मोठ्या आशेने पाहत आहेत.

मात्र,सध्या कोळवाडी परिसरात काही शेतकऱ्यांनी पाइपलाइनच्या कामाला विरोध केल्याने अथवा कामास अडथळे निर्माण झाल्याने संबंधित काम रखडल्याचे समजते.त्यामुळे योजनेची पुढील प्रक्रिया नेमकी कुठे अडकली आहे,काम पूर्ण होण्यास विलंब का होत आहे आणि निर्माण झालेल्या अडचणी सोडविण्यासाठी प्रशासनाकडून कोणती पावले उचलली जात आहेत,असे प्रश्न उपस्थित होत आहेत.

विशेष म्हणजे,दोन वर्षांपूर्वी या योजनेचे पाणीपूजन जलसंपदामंत्री राधाकृष्ण विखे पाटील यांच्या हस्ते करण्यात आले होते.त्यावेळी परिसरातील शेतकऱ्यांमध्ये मोठ्या प्रमाणावर अपेक्षा निर्माण झाल्या होत्या.मात्र, पाणीपूजनाचा कार्यक्रम होऊन दोन वर्षे उलटली तरी प्रत्यक्षात पाणी शेतकऱ्यांपर्यंत पोहोचलेले नाही.त्यामुळे केवळ भूमिपूजन,पाणीपूजन आणि आश्वासनांपुरतेच हे काम मर्यादित राहणार का,असा प्रश्न शेतकरी उपस्थित करत आहेत.

दरम्यान, गुंजाळवाडीच्या सरपंच नयनाताई रामदास गुंजाळ यांनी या योजनेचे काम तातडीने पूर्ण करण्याची मागणी केली आहे.चिल्हेवाडी धरणातील पाणी गुळुंचवाडीपर्यंत आणण्याची ही योजना परिसरातील शेतकऱ्यांसाठी अत्यंत महत्त्वाची आहे. गुळुंचवाडी,बेल्हे, राजुरी आणि गुंजाळवाडी परिसरातील शेतकऱ्यांना या पाण्याचा लाभ मिळू शकतो.मात्र,कोळवाडी परिसरात काम रखडल्याने संपूर्ण योजनेलाच विलंब होत आहे. संबंधित विभागाने यामध्ये तातडीने लक्ष घालून निर्माण झालेल्या अडचणी दूर कराव्यात आणि पाइपलाइनचे अपूर्ण काम पूर्ण करून शेतकऱ्यांना पाणी उपलब्ध करून द्यावे,अशी मागणी त्यांनी केली आहे.

कामातील अडथळा कोण दूर करणार?

शेतीसाठी पाणी ही या परिसरातील शेतकऱ्यांची अत्यंत महत्त्वाची गरज आहे.एका ठिकाणी काम अडकल्यामुळे अनेक गावांमधील शेतकऱ्यांना अपेक्षित लाभापासून वंचित राहावे लागत असेल,तर संबंधित विभागाने मध्यस्थी करून शेतकरी आणि यंत्रणा यांच्यात समन्वय साधणे आवश्यक आहे. जमिनीशी संबंधित काही अडचणी किंवा परवानग्यांचे प्रश्न असतील,तर ते चर्चेतून मार्गी लावण्याची गरज आहे. दोन वर्षांपूर्वी मोठ्या अपेक्षेने सुरू झालेल्या या योजनेचे पाणी प्रत्यक्षात शेतकऱ्यांच्या बांधापर्यंत कधी पोहोचणार? कोळवाडीतील कामाचा अडथळा कोण दूर करणार? संबंधित जलसंपदा विभाग याची दखल घेऊन कामाला गती देणार का?असे अनेक प्रश्न आता उपस्थित होत आहेत.