पाटणा : लालूप्रसाद यादवजी, जर तुम्ही बिहारच्या लोकांसाठी काही केले असेल तर त्याचे हिशेब आणा आणि आम्हाला सांगा. ज्या ज्या वेळी बिहारमध्ये लालूप्रसाद यादव आणि राबडीदेवी यांची सत्ता स्थपन झाली, त्या प्रत्येक वेळी राज्य रसातळाला गेले, अशा शब्दांत केंद्रिय गृहमंत्री अमित शहा यांनी लालू कुटुंबावर टीका केली.

राष्ट्रीय लोकशाही आघाडीकडून बिहार विधानसभा निवडणुकीची प्रत्यक्ष तयारी आता सुरू होत आहे. शनिवारी केंद्रीय गृहमंत्री अमित शहा यांनी त्यांच्या पक्षाला याबाबत स्पष्ट संदेश दिला होता. आता ते एनडीए नेत्यांमध्ये बिहार निवडणुकीच्या तयारीबद्दल चर्चा करताना दिसत आहेत. अमित शाह यांनी आज पाटण्यातील बापू सभागृहातून ४ विभागांच्या ८२३ कोटी रुपयांच्या योजनांचे भूमिपूजन आणि उद्घाटन केले. या कार्यक्रमाला मुख्यमंत्री नितीश कुमार, उपमुख्यमंत्री सम्राट चौधरी, विजय सिन्हा आणि सहकार मंत्री प्रेम कुमार यांच्यासह इतर उपस्थित आहेत. यासोबतच त्यांनी मिथिलाच्या महत्त्वाकांक्षी प्रकल्प मखाना प्रक्रिया केंद्राचे ऑनलाइन उद्घाटनही केले.

लालूप्रसाद यांच्या काळात सहकार क्षेत्र कोसळले होते. ते उद्ध्वस्त करण्याचे श्रेय लालू आणि लालू कंपनीला जाते. लालू प्रसाद यादव यांनी जातीय हत्याकांड आणि चारा घोटाळा करून बिहारची देशात आणि जगात बदनामी केली. लालू आणि राबडी सरकार जंगलराज म्हणून ओळखले जाईल, असे सांगून शहा म्हणाले की, लालूप्रसाद यांच्या काळात जातीय हिंसाचार, दंगली आणि गुंडांना राजाश्रय देण्यात आला.

अमित शहा म्हणाले की, पंतप्रधान नरेंद्र मोदी यांनी बिहारसाठी खूप काही केले आहे. त्यांनी सहकारी संस्थांना बळकटी देण्यासाठी काम केले. सहकार्याचा सर्वात जास्त फायदा जर कोणत्याही राज्याला होणार असेल तर ते बिहार असेल. बंद पडलेले साखर कारखाने पुन्हा सुरू करण्यासाठी ते सर्व शक्ती पणाला लावतील. त्यासाठीच २०२५ च्या निवडणुकीत एनडीए सरकार स्थापन करण्याचे आपण सगळ्यांनी ठरवू या.

मुख्यमंत्री नितीश कुमार यांची विरोधकांवर टीका
विरोधकांवर हल्लाबोल करताना मुख्यमंत्री नितीश कुमार म्हणाले की, आज बिहारमध्ये काम खूप चांगले सुरू आहे. इतके काम आजपर्यंत कोणीही करू शकलेले नाही. महिला आता किती चांगले काम करत आहेत. राष्ट्रीय जनता दलाने आजपर्यंत काही काम केले आहे का? काहीही केले नाही. आम्ही सुरुवातीपासूनच सर्व काम पूर्ण करत आहोत. २००५ पूर्वी लोक संध्याकाळनंतर घराबाहेर पडण्यासही घाबरत होते.

हिंदू आणि मुस्लिमांमध्ये खूप भांडणे व्हायची. पण आम्ही सगळं व्यवस्थित केलं. आता कुठेही हिंदू आणि मुस्लिमांमध्ये भांडणे होत नाहीत. पूर्वी शाळांमध्ये अभ्यास नव्हता आणि शिक्षणही मिळत नव्हते, पण आता पहा, सर्वत्र शिक्षकांची नियुक्ती करून शाळा व्यवस्था सुधारली आहे. पूर्वीची परिस्थिती काय होती? पूर्वी आरोग्यसेवेची स्थिती कशी होती? आता, प्रत्येक आरोग्य केंद्र आणि रुग्णालयात औषधे आणि डॉक्टरांची व्यवस्था करण्यात आली आहे.