Nitin Navin : भाजपचे राष्ट्रीय अध्यक्ष म्हणून नितीन नवीन यांनी २० जानेवारी रोजी औपचारिकपणे पदभार स्वीकारल्यानंतर सहा महिने उलटले असून, आता नितीन नवीन यांच्या नेतृत्वाखालील नव्या राष्ट्रीय टीमची घोषणा लवकरच होण्याची शक्यता व्यक्त केली जात आहे.

गुरुवारी केंद्रीय गृहमंत्री अमित शाह आणि भाजपचे राष्ट्रीय महासचिव (संघटन) बी. एल. संतोष यांच्यासोबत झालेल्या जवळपास तीन तासांच्या बैठकीनंतर संघटनात्मक बदलांना अंतिम स्वरूप दिले जात असल्याची चर्चा आहे.

अमित शाह यांच्या निवासस्थानी झालेल्या या बैठकीबाबत अधिकृत माहिती देण्यात आलेली नसली, तरी भाजपच्या नव्या राष्ट्रीय पदाधिकाऱ्यांच्या निवडीसह आगामी राजकीय रणनीतीवर सविस्तर चर्चा झाल्याचे पक्षातील सूत्रांचे म्हणणे आहे. ( Nitin Navin)

ही बैठक केवळ संघटनात्मक आढावा नसून, आगामी विधानसभा निवडणुका आणि २०२९ च्या लोकसभा निवडणुकीच्या दृष्टीने पक्षाचा भविष्यातील आराखडा निश्चित करण्यासाठी महत्त्वाची मानली जात आहे.

राष्ट्रीय स्तरावरही महिलांना अधिक संधी  ( Nitin Navin)

सूत्रांच्या माहितीनुसार, नितीन नवीन यांच्या नेतृत्वाखालील नव्या टीममध्ये ज्येष्ठ नेत्यांच्या अनुभवासोबतच तरुण नेतृत्वालाही संधी दिली जाणार आहे. मोदी सरकारमधील काही केंद्रीय मंत्र्यांनाही संघटनेत महत्त्वाच्या जबाबदाऱ्या देण्याची शक्यता वर्तवली जात आहे. उत्तर प्रदेश भाजपच्या नव्या कार्यकारिणीत १३ महिलांना स्थान देण्यात आल्याने राष्ट्रीय स्तरावरही महिलांना अधिक संधी मिळण्याची शक्यता व्यक्त केली जात आहे.

हेही वाचा : Ketan Aggarwal Case : केतन अग्रवाल प्रकरणात नवा ट्विस्ट; चेतनचा वर्गमित्र पोलिसांच्या ताब्यात, मोठी माहिती समोर

दक्षिण भारतातील राज्यांमध्ये पक्षाची संघटनात्मक ताकद वाढवण्यासाठी तेथील नेत्यांना नव्या राष्ट्रीय टीममध्ये महत्त्वाच्या जबाबदाऱ्या दिल्या जाऊ शकतात. तसेच उत्तर प्रदेश, पंजाब, बिहार आणि पश्चिम बंगाल या राजकीयदृष्ट्या महत्त्वाच्या राज्यांनाही नव्या राष्ट्रीय कार्यकारिणीत योग्य प्रतिनिधित्व मिळण्याची शक्यता आहे.

काही मंत्र्यांना संघटनेत मोठी जबाबदारी मिळण्याची शक्यता  ( Nitin Navin)

विशेषतः उत्तर प्रदेश आणि पंजाबमध्ये होणाऱ्या आगामी विधानसभा निवडणुकांच्या पार्श्वभूमीवर या राज्यांना अधिक प्राधान्य दिले जाऊ शकते. केंद्रीय पेट्रोलियम मंत्री हरदीप सिंग पुरी आणि सामाजिक न्याय राज्यमंत्री बी. एल. वर्मा यांचा राज्यसभा कार्यकाळ २५ नोव्हेंबर २०२६ रोजी संपत असल्याने काही केंद्रीय मंत्र्यांना संघटनेत जबाबदारी दिली जाऊ शकते, अशीही चर्चा आहे.

हेही वाचा : Gold-Silver Rate : सोनं पुन्हा स्वस्त! सलग दुसऱ्या दिवशी मोठी घसरण, चांदीने मात्र घेतली भरारी