Sunil Tatkare :  गेल्या काही दिवसांपासून दोन्ही राष्ट्रवादी एकत्र येणार असल्याच्या चर्चांना उधाण आले आहे. याचदरम्यान राष्ट्रवादी काँग्रेसचे प्रदेशाध्यक्ष सुनील तटकरे आणि धनंजय मुंडे यांनीही मुख्यमंत्री देवेंद्र फडणवीस यांची ‘वर्षा’ या शासकीय निवासस्थानी भेट घेतली. सुनील तटकरे यांनी मुख्यमंत्र्यांची भेट घेण्याच्या एक दिवसआधी उपमुख्यमंत्री सुनेत्रा पवार यांची भेट घेतल्याने या भेटीला महत्त्व प्राप्त झाले आहे.

मात्र सुनील तटकरे यांनी एक्सवर मुख्यमंत्र्यांच्या भेटीचा फोटो पोस्ट करत “दिवाळीनिमित्त आज राज्याचे माननीय मुख्यमंत्री देवेंद्रजी फडणवीस यांची सदिच्छा भेट घेतली. यावेळी त्यांना दीपावलीच्या मनःपूर्वक शुभेच्छा दिल्या. दिवाळीनिमित्त झालेली ही भेट आनंददायी ठरली”, असे म्हंटले आहे.

धनंजय मुंडे यांनीही घेतली मुख्यमंत्र्यांची भेट
राष्ट्रवादी काँग्रेसचे आमदार तथा माजी मंत्री धनंजय मुंडे यांनी देखील मुख्यमंत्री देवेंद्र फडणवीस यांची ‘वर्षा’ या शासकीय निवासस्थानी जाऊन भेट घेतली. धनंजय मुंडे यांनी देखील ‘एक्स’ पोस्ट करत या भेटीबाबत माहिती दिली.

“राज्याचे मुख्यमंत्री देवेंद्र भाऊ फडणवीस यांची त्यांच्या निवासस्थानी भेट घेऊन दीपावलीच्या निमित्ताने शुभेच्छा दिल्या. यावेळी मराठवाड्यातील भीषण दुष्काळी परिस्थितीची माहिती देत भाऊंना राज्यातील शेतकऱ्यांना जास्तीत जास्त मदत करण्याची विनंती चर्चेदरम्यान केली. त्यास भाऊंनी सकारात्मक प्रतिसाद देत शेतकऱ्यांना सर्वतोपरी मदत केली जाईल, असे आश्वस्त केले”, असं धनंजय मुंडे म्हणाले आहेत.

या सर्व घडामोडी सुरु असताना सत्ताधारी राष्ट्रवादी काँग्रेसचे प्रवक्ते उमेश पाटील यांनी मोठं वक्तव्य केलं आहे. अजित पवार यांचा अपघात नाही तर घातपातच झाला आहे, असं उमेश पाटील यांनी म्हंटले आहे. “तो घातपातच आहे, असं वाटतं. असं का वाटतं. योग्य त्या प्लॅटफॉर्मवर योग्य त्या पद्धतीने खासदार पार्थ पवार, जय पवार, उपमुख्यमंत्री सुनेत्रा पवार पाठपुरावा करत आहेत”, असं उमेश पाटील म्हणाले आहेत. सत्ताधारी राष्ट्रवादीचे उमेश पाटील यांनीच असं वक्तव्य केल्याने पडद्यामागे नेमकं काय घडतं आहे, याबाबत आता चर्चांना उधाण आले आहे.

Umesh Patil : ‘अजितदादा महायुती सोडणार होते, याचा ठोस पुरावा काय?’; उमेश पाटलांचा अतुल लोंढेंना सवाल