Umesh Patil : दिवंगत उपमुख्यमंत्री अजित पवार महायुती सोडणार होते, असा दावा काँग्रेसचे प्रदेश मुख्य प्रवक्ते अतुल लोंढे यांनी केला आहे. त्यांच्या या वक्तव्यामुळे राज्याच्या राजकीय वर्तुळात चर्चा सुरू झाली आहे. आता राष्ट्रवादी काँग्रेसचे प्रवक्ते उमेश पाटील यांनी या दाव्यावर प्रश्न उपस्थित करत, त्याला ठोस पुरावा देण्याची मागणी केली आहे. (Umesh Patil)

‘अधिकृत विधान किंवा पत्र जाहीर करा’

उमेश पाटील म्हणाले, “अतुल लोंढे साहेब, अजितदादा महायुती सोडणार होते, या आपल्या दाव्याचा ठोस पुरावा नेमका काय? दादांचे कोणते अधिकृत विधान, पत्र किंवा विश्वासार्ह नोंद आपल्या दाव्याला पुष्टी देते? महाराष्ट्रासमोर ती जाहीर करावी.” (Umesh Patil)

अजित पवार यांच्या निधनानंतर त्यांच्या राजकीय भूमिकेबाबत दावे करताना अधिक जबाबदारीने बोलणे अपेक्षित आहे, असेही पाटील म्हणाले. राजकारणात आरोप करण्याचा अधिकार सर्वांना आहे; मात्र आरोप सिद्ध करण्याची जबाबदारीही आरोप करणाऱ्याचीच असते, अशी भूमिका त्यांनी मांडली. (Umesh Patil)

भाजपच्या ‘वापरा आणि फेका’ धोरणावरून वाद

दरम्यान, अतुल लोंढे यांनी भाजपवर ‘वापरा आणि फेका’ धोरणाचा अवलंब करत असल्याची टीका केली होती. मित्रपक्षांना सोबत घेऊन सत्ता मिळवायची आणि त्यानंतर त्यांचे राजकीय महत्त्व कमी करायचे, अशी भाजपची कार्यपद्धती असल्याचा आरोप त्यांनी केला होता. (Umesh Patil)

या टीकेला उत्तर देताना उमेश पाटील यांनी भाजप आणि मित्रपक्षांच्या दीर्घकालीन राजकीय संबंधांचा दाखला दिला. NDA चा इतिहास आणि भाजपसोबत विविध पक्षांनी केलेले दीर्घकालीन राजकीय सहकार्य लक्षात घ्यावे, असे ते म्हणाले. (Umesh Patil)

उमेश पाटील यांनी दिलेली राजकीय संबंधांची आकडेवारी

उमेश पाटील यांनी विविध पक्ष आणि भाजप यांच्यातील संबंधांचा कालावधी पुढीलप्रमाणे मांडला :

शिवसेना–भाजप : 37 वर्षांचा राजकीय संबंधांचा इतिहास
जनता दल (युनायटेड)/समता पार्टी–भाजप : 30 वर्षे
तेलुगू देसम–भाजप : 28 वर्षे
अपना दल–भाजप : 12 वर्षे
आसाम गण परिषद–भाजप : 10 वर्षे
NDPP–भाजप : 8 वर्षे
निषाद पार्टी–भाजप : 7 वर्षे
जनता दल (सेक्युलर)–भाजप : 3 वर्षे
राष्ट्रवादी काँग्रेस–भाजप : 3 वर्षांहून अधिक काळ

या राजकीय संबंधांमध्ये मतभेद झाले, युती तुटल्या आणि पुन्हा जुळल्याही, ही वस्तुस्थिती असल्याचे पाटील यांनी मान्य केले. मात्र, दशकानुदशके टिकलेल्या राजकीय सहकार्याकडे दुर्लक्ष करून सरसकट ‘वापरा आणि फेका’ असा निष्कर्ष काढणे कितपत योग्य आहे, असा सवाल त्यांनी केला. (Umesh Patil)

अतुल लोंढे यांनी इतिहास आणि आकडेवारीच्या आधारे आपल्या टीकेला उत्तर द्यावे, तसेच अजित पवार महायुती सोडणार होते या दाव्याला पुराव्याची जोड द्यावी, असे आवाहन उमेश पाटील यांनी केले. (Umesh Patil)