पुणे – पुण्यामध्ये पार पडलेल्या महाराष्ट्र केसरी स्पर्धेमध्ये पैलवान शिवराज राक्षे आणि पैलवान महेंद्र गायकवाड यांच्यामध्ये अंतिम निकालासाठी लढत झाली. या स्पर्धेसाठी उपमुख्यमंत्री देवेंद्र फडणवीस यांच्यासह पालकमंत्री चंद्रकांत पाटील आणि क्रीडा मंत्री गिरीश महाजन हे देखील उपस्थित होते. अंतिम सामन्यापूर्वी उपमुख्यमंत्री देवेंद्र फडणवीस यांनी ‘आम्ही देखील राजकारणात कुस्ती करतो’ असे म्हणत चांगलीच शाब्दिक फटकेबाजी केली.

“लाल माती आणि मॅटवरील पैलवान कुस्ती खेळतात,त्याप्रमाणे आम्ही देखील राजकारणात कुस्ती करतो. पण सध्याच्या काळात आमची कुस्ती ही केवळ टीव्हीवरच्या स्क्रिनवर चालते. पण टीव्हीवरच्या कुस्तीमधून कधी कधी राजकारणात एक महाराष्ट्र केसरी हा महाराष्ट्राचा मुख्यमंत्री बनतो हे आपण नुकतंच पाहिलं आहे. ” असं फडणवीस महाराष्ट्र केसरी स्पर्धेच्या मंचावरून बोलताना म्हणाले.

देवेंद्र फडणवीस यांनी यावेळी सर्व कुस्ती पटुंना आनंदाची बातमी देत, सर्व कुस्तीपटूंचे मानधन वाढवण्याचा निर्णय जाहीर केला. तसेच ब्रिजभूषण सिंह यांनी मांडलेल्या प्रस्तावावर बोलताना फडणवीस यांनीं लवकरच महाराष्ट्र मिशन ऑलिम्पिक सुरु करणार असल्याचे देखील जाहीर केले.

अंतिम लढतीत शिवराज राक्षेची बाजी
महाराष्ट्र केसरी’ कुस्ती स्पर्धेत शिवराज राक्षेने सोलापूरच्या महेंद्र गायकवाड याला अवघ्या दीड मिनिटात चीतपट करत 65 व्या राज्य अजिंक्यपद कुस्ती व प्रतिष्ठेच्या ‘महराष्ट्र केसरीची गदा’ पटकावली. शिवराज राक्षेच्या रूपाने महाराष्ट्राला नवा ‘महाराष्ट्र केसरी’ मिळाला आहे. तर, स्पर्धेत सातत्यपूर्ण कामगिरी करणाऱ्या महेंद्र गायकवाड याला उपमहाराष्ट्र केसरीवर समाधान मानावे लागले.महाराष्ट्र केसरी शिवराज राक्षे याला मानाची गदा, महिंद्रा थार ही गाडी व रोख पाच लाख रुपयांचे बक्षीस तर उपमहाराष्ट्र केसरी महेंद्र गायकवाड याला मानाची गदा, ट्रक्टर व रोख अडीच लाख रुपये देवून सन्मानित करण्यात आले.