Eknath Khadse : पुण्यातील खराडी परिसरातील उच्चभ्रू सोसायटीतील फ्लॅटमध्ये सुरू असलेल्या रेव्ह पार्टीवर पुणे गुन्हे शाखेच्या पोलिसांनी शनिवारी धाड टाकली. या प्रकरणी पोलिसांनी माजी मंत्री एकनाथ खडसे यांचे जावई प्राजंल खेवलकर यांना अटक केली आहे. तसेच इतर सहा जणांनाही पोलिसांनी अटक केली आहे. अटक करण्यात आलेल्या आरोपींची आज पोलीस कोठडीची मुदत संपत असल्याने या प्रकरणाची सुनावणी न्यायालयात पार पडणार आहे. या सुनावणीच्या अगोदर एकनाथ खडसे यांनी पुण्यात पत्रकार परिषद घेत गंभीर आरोप केले आहेत. खडसे कुटुंबाला बदनाम करण्याचा प्रयत्न केला जात असून, रेव्ह पार्टीची व्याख्या काय? असा सवाल त्यांनी पोलिसांना केला आहे. तसेच पोलिस करत असलेल्या कारवाईवरही त्यांनी ताशेरे ओढले आहेत. मी माझ्या आयुष्यात कधीच ड्रग्ज घेतलेले नाही, असे माझ्या जावयाने मला सांगितलं आहे. तसेच पोलीस प्राजंल खेवलकर यांच्यावर आधीपासूनच पाळत ठेवून होते, असा गंभीर आरोप खडसेंनी केला आहे. त्यांना एक नंबरचा आरोपी का केला? या प्रकरणावर राजकारण चांगलेच तापले असून, एकनाथ खडसे या प्रकरणावरून पोलिसांवर संतापल्याचे पाहायला मिळाले. रेव्ह पार्टीची व्याख्या काय? एका घरात पाच लोकं आली म्हणजे रेव्ह पार्टी होते का? असा सवाल खडसेंनी केला आहे. या प्रकरणात खडसे कुटुंबाची बदनामी केली जात आहे. या प्रकरणाचा कुणीतरी सुत्रधार आहे, असेही खडसे म्हणाले आहेत. प्रांजल खेवलकर यांच्यावर एक ही गुन्हा नाही. त्यांना एक नंबरचा आरोपी का केला? असा सवाल एकनाथ खडसे यांनी पोलिसांना विचारला आहे. तसेच हे कृत्य निव्वळ बदनामी करण्यासाठी केले आहे. आमचा लढा सुरू राहिल. सत्य काय ते समोर येईल, असे खडसे यांनी सांगितले आहे.
