कोलकाता – प. बंगालमधील सात जागांसाठी आज मतदान झाले मात्र राज्याच्या मुख्यमंत्री आणि तृणमूल कॉंग्रेसच्या अध्यक्षा ममता बॅनर्जी यांचे बंधु बाबुन बॅनर्जी यांचेही नाव मतदार यादीत नसल्यामुळे त्यांना मतदान न करता परत यावे लागले. एका निवडणूक अधिकाऱ्यानेच माध्यमांना ही माहिती दिली. बाबुन बॅनर्जी हावडा येथील आपल्या मतदान केंद्रावर मतदान करण्यासाठी गेले असता त्यांचे नाव मतदार यादीत नसल्याचे त्यांना आढळून आले. त्यामुळे आता या मुद्द्यावरून तृणमूल कॉंग्रेसने निवडणूक आयोगाबद्दल प्रश्‍नचिन्ह उपस्थित केले आहे.

पक्षाचे प्रवक्ते शांतनु सेन म्हणाले की निवडणूक आयोगाची संपूर्ण प्रक्रियेवर देखरेख आहे. त्यामुळे नेमके काय झाले याचे उत्तर तेच देऊ शकतात. तर बाबुन बॅनर्जी यांनी मात्र या विषयावर प्रसारमाध्यमांशी काही बोलण्यास नकार दिला. विशेष म्हणजे ममता यांनी हावडा मतदारसंघातून विद्यमान खासदार प्रसून बॅनर्जी यांनाच पुन्हा तिकिट दिल्यामुळे बाबुन बॅनर्जी यांनी त्याबाबत नाराजी व्यक्त केली होती.

तेंव्हा आपल्या भावाशी आपला काही संबंध नसून आपण त्याच्याशी नाते तोडले असल्याचे ममता यांनी जाहीरपणे सांगितले होते. असे सांगितले जात होते की तृणमूलने तिकिट न दिल्यास अपक्ष म्हणून रिंगणात उतरण्याची त्यांची तयारी होती. बाबुन भारतीय जनता पार्टीत प्रवेश करू शकतात अशी अफवाही होती.

दरम्यान, बाबुन बंगाल ऑलिंपिक असोसिएशन आणि बंगाल हॉकी असोसिएशनचे अध्यक्ष आहेत. बॉक्सिंग असोसिएशनचे ते सचिव असून तृणमूल कॉंग्रेसच्या क्रिडा शाखेचे प्रभारी होते. बाबुन यांना आपण आपल्या कुटुंबातील सदस्य मानत नाही आणि त्यांच्याशी असलेले आपले नाते संपुष्टात आले आहे असे ममतांनी पत्रकार परिषदेतच सांगितले होते.