Weather Updates: यंदा राज्यात झालेल्या कमी पावसामुळे दुष्काळाची परिस्थिती ओढावली आहे. याचदरम्यान महाराष्ट्रात ऑक्टोबर हिटमुळे मुंबई, पुणे आणि नाशिकसह संपूर्ण महाराष्ट्रात उन्हाचे चटके जाणवत आहे.

आता नवरात्रीच्या काळात हवामानात मोठे उलटफेर जाणवत आहेत. दक्षिण मध्य महाराष्ट्रासह कोकण आणि मराठवाड्यातील काही जिल्ह्यांत पावसाने हजेरी लावल्याचे चित्र पाहायला मिळाले.  काल कोल्हापूर, चिपळूण, धुळे, सांगलीतील अनेक भागात पावसाच्या सरी बरसल्या. त्यामुळे उकाड्याने हैराण झालेल्या नागरिकांना हवामानात गारवा निर्माण झाल्यामुळे दिलासा मिळाला. तरी दुष्काळाचे संकट दूर होण्यासाठी पावसाची प्रतीक्षा कायम आहे.

आज कुठे-कुठे बरसणार पाऊस? 

कोकण विभागातील पालघर, ठाणे आणि मुंबई येथे आज हवामान प्रामुख्याने कोरडे राहण्याची शक्यता आहे. रायगड आणि रत्नागिरीसह सिंधुदुर्ग जिल्ह्यात हलक्या ते मध्यम सरी पडण्याचा अंदाज आहे.

पश्चिम महाराष्ट्रातील सांगली, कोल्हापूरसह काही भागात गेल्या दोन दिवसांपासून पावसाने हजेरी लावली. आज पुणे, सातारा आणि घाटमाथ्याच्या परिसरात हलक्या ते मध्यम सरी पडण्याची शक्यता आहे. कोल्हापूर, सातारा, सांगली आणि सोलापूर जिल्ह्यांमध्ये काही भागांसाठी येलो अलर्ट देण्यात आला आहे. पुढील दोन ते तीन दिवस काही भागांमध्ये पावसाचे वातावरण कायम राहू शकते.

मराठवाड्यात छत्रपती संभाजीनगर आणि जालना येथे हवामान प्रामुख्याने कोरडे राहण्याची शक्यता आहे. परभणी आणि बीड जिल्ह्यांत हलक्या सरींचा अंदाज आहे. तर हिंगोली, नांदेड, लातूर आणि धाराशिव जिल्ह्यांत येलो अलर्ट देण्यात आला आहे. विदर्भातील बहुतांश जिल्ह्यांमध्ये हवामान कोरडे, ढगाळ आणि काही ठिकाणी दमट राहण्याची शक्यता आहे.

सांगलीत दमदार पाऊस

दरम्यान, चिपळूण, धुळे जिल्ह्यात मोठ्या खंडानंतर पावसाने हजेरी लावली. सांगलीतील तासगाव तालुक्याचा नुकताच दुष्काळी यादीत समावेश झाला आहे. काल तासगाव तालुक्यातील काही गावांमध्ये भर दुपारी झालेल्या मुसळधार पावसामुळे या भागातील रब्बी पेरणी केलेल्या पिकांना काही प्रमाणात दिलासा मिळण्याची शक्यता आहे.

हेही वाचा:  

Ration Card : पिंपरी-भोसरीत ३९ हजारांहून अधिक शिधापत्रिकाधारकांची ई-केवायसी प्रलंबित