भूगाव : नुकत्याच झालेल्या जिल्हापरिषद व पौड पंचायत समितीमध्ये निवडून आलेल्या भाजपा व शरदचंद्र पवार पक्षाच्या उमेदवारांचा सत्कार माण ग्रामपंचायत येथे करण्यात आला. शासनाकडून लवकरच सभापती व उपसभापती निवडीचा कार्यक्रम जाहीर केला जाणार आहे. मुळशी तालुक्यात कोणत्याच पक्षाला स्पष्ट बहुमत मिळालेले नाही. राष्ट्रवादी अजित पवार गटाचे तालुका अध्यक्ष यांनी निवडणूक निकालानंतर सभापती युतीचा होईल असे सांगितले होते. त्यानंतर माण येथील भाजपाने आयोजित केलेल्या सत्कार सोहळ्याला शरदचंद्र पवार पक्षाचे राहुल पवळे व दगडू काका करंजावणे हे दोन पंचायत समिती सदस्य कार्यक्रमात उपस्थित राहिल्याने सर्वांच्याच भुवया उंचावल्या होत्या. त्या पार्श्वभूमीवर माजी आमदार थोपटे यांनी मुळशीचा सभापती महायुतीचाच होईल असे निश्चयपूर्वक वक्तव्य केल्याने येणार्या काळात सभापती निवडीबाबत मोठा ट्विस्ट पाहायला मिळणार असल्याचे बोलले जात आहे. या कार्यक्रमाच्या अध्यक्षस्थानी भोर, राजगड मुळशीचे माजी आमदार संग्राम थोपटे हे होते यावेळी ते बोलत होते. याप्रसंगी माण-हिंजवडी गटातून विजयी झालेले भाजपचे शिवाजी बुचडे, हिंजवडी गणातून विजयी झालेल्या भाजपच्या उमेदवार ऐश्वर्या वाघमारे, पिरंगुट गणातून विजयी झालेले राहुल पवळे व भूगाव गणातून विजयी उमेदवार दगडू करंजावणे यांचा सत्कार थोपटे यांच्या हस्ते करण्यात आला. यावेळी बोलताना थोपटे म्हणाले की, मुळशी पंचायत समितीचा सभापती हा महायुतीचाच होईल. मग तो ईश्वरी चिठ्ठीने होईल किंवा बहुमताने. शासनाने सभापती निवडीचा कार्यक्रम जाहीर झाल्यानंतर याबाबत स्पष्टता येईल. यावेळी माजी सभापती पांडुरंग ओझरकर, माण ग्रामपंचायतीच्या सरपंच कविता आढाव, मुळशी तालुका भाजपा अध्यक्ष हनुमंत चव्हाण, सुरेशराव हुलावळे, तानाजी हुलावळे, सुनील भरणे, शशिकांत धुमाळ, बापूसाहेब पारखी, गंगाराम मातेरे, दादाराव मांडेकर, संतोष मोहिते, सचिन आढाव, युवा मोर्चाचे कार्याध्यक्ष प्रसाद खानेकर, अनंता घोगरे, साहेबराव जाधव, पोपटराव सुके, रूपाली बोडके रामचंद्र देवकर, मोरेश्वर घारे, आदी मान्यवर उपस्थित होते. यावेळी बोलताना संतोष मोहिते यांनी माजी आमदार थोपटे व नवनिर्वाचित सदस्यांची जबाबदारी वाढली असून माण येथील समस्या सोडविण्यासाठी तुम्ही पाठपुरावा करावा अशी मागणी त्यांनी आपल्या मनोगतातून केली. मुख्यमंत्र्यांकडे पाठपुरावा करणार माण हिंजवडी औद्योगिक क्षेत्रामुळे व कॅनॉलमुळे शेतकर्यांच्या जमिनीवर भूसंपादनाचे पडलेले शिक्के काढणे, या भागातील सोसायट्यांच्या वीज, पाणी, रस्ते व कचरा व्यवस्थापन या समस्या सोडवण्यासाठी आम्ही मुख्यमंत्र्यांकडे निश्चित पाठपुरावा करू, असे आश्वासन थोपटे यांनी दिले. तसेच आम्ही नागरिकांचे प्रश्न सोडवायला सुरुवात केली की येथील स्थानिक आमदार त्यात खोडा घालतात. या सत्कार सोहळ्याप्रसंगी माण व हिंजवडी गटातील कार्यकर्ते, माण ग्रामपंचायतीचे पदाधिकारी उपस्थित होते.
