Ramdas Athawale: संविधानाच्या अंमलबजावणीची जबाबदारी आम्ही पार पाडतोय; रामदास आठवले यांची राहुल गांधींवर टीका
पिंपरी-चिंचवड महापालिकेच्या प्रभाग क्रमांक १६ मधील नगरसेवक धर्मपाल तंतरपाळे यांच्या विकासनगर, किवळे येथील जनसंपर्क कार्यालयाचे उद्घाटन

देहूरोड – राहुल गांधी हातात संविधानाची प्रत घेतात, मात्र संविधान आमच्या हृदयात आहे. संविधानाची अंमलबजावणी करणे आणि त्याचे रक्षण करण्याची जबाबदारी आम्ही पार पाडत आहोत. पंतप्रधान नरेंद्र मोदी यांच्या नेतृत्वाखाली केंद्र सरकार योग्य पद्धतीने कारभार करीत आहे, असे प्रतिपादन केंद्रीय सामाजिक न्याय राज्यमंत्री तथा रिपब्लिकन पार्टी ऑफ इंडिया (आठवले गट) चे राष्ट्रीय अध्यक्ष रामदास आठवले यांनी केले.
पिंपरी-चिंचवड महापालिकेच्या प्रभाग क्रमांक १६ मधील नगरसेवक धर्मपाल तंतरपाळे यांच्या विकासनगर, किवळे येथील जनसंपर्क कार्यालयाचे उद्घाटन रविवारी (दि. १५) रामदास आठवले यांच्या हस्ते करण्यात आले. यावेळी आयोजित कार्यक्रमात ते बोलत होते.
युवकांना मार्गदर्शन करताना आठवले म्हणाले की, युवकांनी शासनाच्या विविध योजनांची माहिती घेऊन त्यांचा लाभ घ्यावा. केवळ नोकरीच्या मागे न लागता उद्योग-व्यवसाय सुरू करून रोजगारनिर्मिती करावी. उद्योजकतेच्या माध्यमातून आर्थिक स्वावलंबन साधत स्वतःच्या पायावर उभे राहावे, असे आवाहन त्यांनी केले.
कार्यक्रमात रामदास आठवले यांच्या हस्ते दिव्यांग विद्यार्थ्यांसाठी ११ हजार रुपयांचा निधी धनादेशाद्वारे सुपूर्द करण्यात आला. नगरसेवक धर्मपाल तंतरपाळे यांच्या जनसंपर्क कार्यालयातून प्रभागातील नागरिकांच्या समस्या, नागरी सुविधांचे प्रश्न आणि विकासकामांबाबत पाठपुरावा केला जाणार आहे.
यावेळी रिपब्लिकन पार्टी ऑफ इंडिया (आठवले गट) चे पिंपरी-चिंचवड शहराध्यक्ष तथा नगरसेवक धर्मपाल तंतरपाळे, नगरसेवक निलेश तरस, नगरसेविका ऐश्वर्या तरस, रेश्मा कातळे आदी उपस्थित होते.
Maval News: पाण्यासाठी दोन तासांची पायपीट; महागाव ग्रामपंचायतीला ग्रामस्थांचे टाळे ठोको आंदोलन





