Satara: जिल्ह्यात यंदा तब्बल 21 टक्के पावसाची तूट नोंदली गेल्याने दुष्काळाची भीषण छाया गडद होत असताना, सातारा नगरपालिकेच्या हद्दीत मात्र पाण्याच्या वापराबाबत धक्कादायक बेफिकिरी स्पष्ट होत आहे. लोकशाहीर अण्णाभाऊ साठे यांच्या पुतळ्याचा परिसर नळाच्या पाण्याने धुणे आणि स्मारक परिसर धुऊन स्वच्छ करण्याचे काम कर्मचाऱ्यांनी केलेय या प्रकाराबाबत नागरिकांनी संताप व्यक्त केला. नागरिकांनी आक्षेप घेतलयानंतर ठेकेदाराच्या अखत्यारीतील कर्मचाऱ्यांची उपनगराध्यक्षांनी कानउघाडणी केली. विशेष म्हणजे, सातारा शहराला कास तलावामुळे सध्या पाण्याची टंचाई नसली तरी पाणी जपून वापरा असे आवाहन नगरपालिकेकडून वारंवार केले जात आहे. मात्र, प्रत्यक्षात सार्वजनिक ठिकाणी पाण्याची अशी उधळपट्टी होत असल्याने पालिकेच्या आवाहनालाच हरताळ फासला जात असल्याची टीका होत आहे.

घटनास्थळी उपस्थित सतर्क नागरिकांनी संबंधित कर्मचार्‍यांना पाण्याची नासाडी थांबवण्यास सांगितले असता, ‘तुम्हाला काय करायचे ते करा,’ अशा उर्मट शब्दांत उत्तर देण्यात आल्याचे नागरिकांनी सांगितले. त्यानंतर नागरिकांनी थेट नगराध्यक्ष अमोल मोहिते आणि उपनगराध्यक्ष दत्ता बनकर यांच्याकडे धाव घेतली. पाणीपुरवठा सभापती या नात्याने अ‍ॅड. दत्ता बनकर यांनी घटनास्थळी जाऊन संबंधित ठेकेदाराच्या कर्मचार्‍यांची चांगलीच कानउघाडणी करत तंबी दिली.

अण्णाभाऊ साठे पुतळा परिसराची स्वच्छता आणि देखभाल होणे आवश्यकच आहे. मात्र, दुष्काळाच्या पार्श्‍वभूमीवर पाण्याचे दुर्भीक्ष लक्षात घेऊन अत्यल्प पाण्यात किंवा पर्यायी पद्धतीने हे काम करता आले असते. अशा असंवेदनशील कृतीमुळे समाजात चुकीचा संदेश जात असून, पाणी बचतीबाबत प्रशासनाची भूमिका केवळ कागदोपत्रीच असल्याचा सूर नागरिकांतून उमटत आहे.

 प्रश्न प्रशासनालाच

टंचाई संकटात पाण्याने पुतळा धुण्याची गरज काय?
पाणी बचतीचे आवाहन फक्त नागरिकांसाठीच का?
ठेकेदाराला पाण्याच्या वापराबाबत स्पष्ट निर्देश दिले का?
पुनरावृत्ती रोखण्यासाठी पालिका काय कारवाई करणार?