Madhuri Dixit : दिग्दर्शक संजय लीला भन्साळी यांच्या गाजलेल्या ‘देवदास’ चित्रपटातील ‘डोला रे डोला’ हे गाणे आजही प्रेक्षकांच्या मनात घर करून आहे. मात्र, या गाण्याच्या चित्रीकरणादरम्यान अभिनेत्री माधुरी दीक्षित चार महिन्यांची गरोदर होती, अशी चर्चा अलीकडे पुन्हा एकदा रंगली आहे. आता चर्चांवर स्वतः माधुरीने मौन सोडत खुलासा केला आहे.

काही दिवसांपूर्वी दिवंगत नृत्यदिग्दर्शिका सरोज खान यांच्या माजी सहकारी रुबिना खान यांनी एका मुलाखतीत दावा केला होता की, ‘डोला रे डोला’च्या शूटिंगदरम्यान माधुरी चार महिन्यांची गरोदर होती. या दाव्यानंतर सोशल मीडियावर चर्चांना उधाण आले होते.

मात्र, एका मुलाखतीत माधुरी दीक्षितने हे सर्व दावे फेटाळून लावत खुलासा केला. ती म्हणाली, “माझा मुलगा अरिनचा जन्म २००३ मध्ये झाला होता. त्यामुळे या अफवांमध्ये कोणतेही तथ्य नाही, हे सहज लक्षात येईल.”

हेही वाचा : Kalyan Banerjee: मोठी बातमी ! बंगालमध्ये कल्याण बॅनर्जींवर हल्ला ; भाजपने सर्व आरोप फेटाळले

पुढे माधुरी म्हणाली, ‘डोला रे डोला’चे चित्रीकरण निश्चितच खूप मेहनतीचे आणि शारीरिकदृष्ट्या आव्हानात्मक होते. मात्र, त्यामागचे कारण गरोदरपण नव्हते.“ त्या काळात मी सतत मुंबई आणि अमेरिकेदरम्यान प्रवास करत होते. वारंवार प्रवास आणि सलग रात्रीच्या शिफ्टमुळे थकवा जाणवत होता. त्यामुळे तब्येत थोडी बिघडली होती, पण गरोदरपणाचा त्याच्याशी काहीही संबंध नव्हता,” असे म्हणत तिने गरोदर असल्याच्या दावा नाकारला.

विशेष म्हणजे, १९९९ मध्ये डॉ. श्रीराम नेने यांच्याशी विवाह केल्यानंतरही माधुरीने चित्रपटसृष्टीत सक्रिय काम सुरू ठेवले होते. ‘देवदास’ हा तिच्या मातृत्वाच्या प्रवासापूर्वीचा शेवटचा मोठा चित्रपट ठरला होता.

२००२ मध्ये प्रदर्शित झालेल्या ‘देवदास’मध्ये शाहरुख खान, ऐश्वर्या राय आणि माधुरी दीक्षित यांच्या भूमिका गाजल्या. त्यातील ‘डोला रे डोला’ हे गाणे आजही हिंदी चित्रपटसृष्टीतील सर्वात लोकप्रिय नृत्यदृश्यांपैकी एक मानले जाते.

हेही वाचा : Devendra Fadnavis : जरांगेंनी एका दिवसात उपोषण मागे घेतलं; आता CM फडणवीसांची पहिली प्रतिक्रिया समोर