Wai News – श्रमिक जनता विकास संस्थेचे (ता. जावली) अध्यक्ष आदिनाथ ओंबळे यांच्या पुढाकारातून मेणवली (ता. वाई) येथे कातकरी समाजातील ३४ लाभार्थ्यांना शहरालगत मेणवली येथे प्रत्येकी अर्धा गुंठा या प्रमाणे एकूण १७ गुंठे जमीन उपलब्ध करून देण्यात आली आहे. या उपक्रमामुळे अनेक कुटुंबांच्या स्थिर निवाऱ्याचे स्वप्न साकार होणार आहे. ही जमीन खरेदी शासनाच्या पंडित दीनदयाळ उपाध्याय जमीन खरेदी अर्थसहाय योजनेंतर्गत करण्यात आली असून प्रत्येक लाभार्थ्यास रुपये १ लाख प्रमाणे ३४ लाख इतके अनुदान देण्यात येणार आहे. भूमिहीन कातकरी बांधवांना हक्काची जागा मिळवून देण्याचा शासनाचा हा महत्त्वाकांक्षी उपक्रम प्रत्यक्षात उतरला आहे. या उपक्रमासाठी मार्गदर्शक म्हणून मुख्य कार्यकारी अधिकारी याशनी नागराजन यांचे मार्गदर्शन लाभले.यासाठी ग्रामीण विकास यंत्रणेचे प्रकल्प संचालक विश्वास सिद, उपविभागीय अधिकारी योगेश खरमाटे, तहसीलदार श्रीमती सोनाली मेटकरी, गटविकास अधिकारी नारायण घोलप, नायब तहसीलदार वैभव पवार, विस्तार अधिकारी शाम राठोड, मेणवली ग्रामपंचायतीच्या सरपंच सौ. लक्ष्मी वेदपाठक, उपसरपंच संजय चौधरी, ग्रामपंचायत अधिकारी श्रीम. सुचित्रा राऊत, मंडल अधिकारी श्री. इंगवले, तलाठी श्री. काकडे, कांताराम जाधव यांचे सहकार्य लाभले. या उपक्रमाचे सर्व स्तरांतून कौतुक होत असून कातकरी समाजाच्या सामाजिक व आर्थिक उन्नतीसाठी हा एक महत्त्वपूर्ण टप्पा ठरणार आहे. पंडीत दिनदयाल उपाध्याय घरकुलसाठी जागा खरेदी अर्थसहाय्य योजनेंतर्गत ग्रामपंचायत मेणवली, येथील पीएम जनमनमधील ३४ लाभार्थींना १७ आर जागेसाठी ३४ लाख अनुदान उपलब्ध झाले आहे.
