Mandhardev Temple – वाई तालुक्यातील प्रसिद्ध तीर्थक्षेत्र मांढरदेव येथे दाट झाडी असल्याने माकडांचे प्रमाण जास्त असून अलिकडच्या काही दिवसात ही माकडे हिंस्त्र झाल्याने थेट नागरिकांवर हल्ला करण्याचे प्रमाण वाढले आहे. माकडांचा हा उच्छाद जीवावर बेतत असून वनविभागाने या माकडांचा तातडीने बंदोबस्त करावा अशी मागणी ग्रामस्थांनी केली आहे.

देवीच्या दर्शनासाठी येणारे भाविक दर्शन झाल्यानंतर प्राण्यांवरील प्रेमामुळे किंवा लहान मुलांच्या हट्टापाई त्यांना खाऊ घालतात मात्र अन्न न मिळाल्यास ती हिंस्त्र होवून हल्ला करण्याच्या घटना घडल्या आहेत. मागील आठवड्यात ज्ञानेश्वर विनायक मांढरे हे एक वर्षाच्या मुलासमवेत गाडीवरून जात असताना माकडाने त्यांच्या दुचाकी गाडीवर अचानक उडी मारल्यामुळे ते त्या मुलासह खाली पडले.

यामध्ये त्यांच्या डोक्याला, हाताला, पायाला व लहान मुलाच्या डोक्याला दुखापत झाली. ही घटना ताजी असतानाच दुसर्‍याच दिवशी यशवंत खाशाबा मांढरे या 70 वर्षाचा वृद्धावर चढणीच्या पायरावरील मारुती मंदिर या ठिकाणी माकडाने हल्ला केला.त्यांनाही डोक्याला जखम झाली त्यांच्यावर रुग्णालयात उपचार सुरू आहेत. माकडांच्या या हल्ल्यामुळे नागरिकांच्या जीवितास धोका निर्माण झाला असून या माकडांचा तातडीने बंदोबस्त करण्याची मागणी ग्रामस्थ व भाविकांनी केली आहे.