भारतीय क्रिकेटपटूंचे होणार नुकसान –

क्रिकबझच्या अहवालानुसार, भारतीय क्रिकेटपटूंना एकूण 150-200 कोटी रुपयांचे नुकसान होण्याची शक्यता आहे. विराट कोहलीचे मोबाइल प्रीमियर लीग (MPL) सोबतचे करारमूल्य 10-12 कोटी रुपये वार्षिक आहे, तर रोहित शर्मा आणि धोनी यांना ड्रीम11 आणि विन्झो यांच्याकडून प्रत्येकी 6-7 कोटी रुपये मिळत होते. जसप्रीत बुमराह, केएल राहुल, हार्दिक पंड्या, शुबमन गिल, यशस्वी जैस्वाल यांसारख्या खेळाडूंना ड्रीम11 आणि माय11सर्कल यांच्याकडून 1-6 कोटी रुपये मिळत होते. या बंदीमुळे खेळाडूंच्या जाहिरात उत्पन्नात 20-25% घट होऊ शकते.

बीसीसीआयलाही मोठा फटका –

बीसीसीआयलाही याचा मोठा फटका बसला आहे. ड्रीम11 सोबतचा 358 कोटींचा करार संपुष्टात आला असून, माय11सर्कलच्या आयपीएल प्रायोजकत्वातून मिळणारे 125 कोटी रुपये धोक्यात आहेत. कोलकाता नाइट रायडर्स, लखनऊ सुपर जायंट्स आणि सनरायझर्स हैदराबाद यांसारख्या फ्रँचायझींना 10-20 कोटींचे नुकसान होईल. केंद्र सरकारने हा कायदा सामाजिक आणि आर्थिक नुकसान टाळण्यासाठी आणला आहे. अंदाजे 45 कोटी लोक दरवर्षी 20,000 कोटी रुपये गमावतात, असे सरकारी आकडे सांगतात. या कायद्यामुळे ई-स्पोर्ट्सला प्रोत्साहन मिळेल, पण क्रिकेटच्या आर्थिक व्यवस्थेला मोठा धक्का बसेल.

हेही वाचा – R Ashwin Retirement : अश्विनचा आयपीएलला अलविदा, गेम ऑफ ट्रेड-यूट्यूब चॅनल की सीएसकेशी मतभेद, खरं कारण काय आहे?

ऑनलाइन गेमिंग बंदीच्या निर्णयाने क्रिकेटपटूंच्या ब्रँड मूल्यावर आणि त्यांच्या आर्थिक स्थैर्यावर दीर्घकालीन परिणाम होण्याची शक्यता आहे. विशेषतः विराट कोहली, रोहित शर्मा आणि महेंद्रसिंग धोनी यांसारख्या खेळाडूंना त्यांच्या ब्रँड इंडोर्समेंटमधून मिळणाऱ्या उत्पन्नाचा मोठा हिस्सा गमवावा लागणार आहे. या खेळाडूंनी ऑनलाइन गेमिंग प्लॅटफॉर्म्सच्या माध्यमातून चाहत्यांशी थेट संपर्क साधला होता, ज्यामुळे त्यांची लोकप्रियता आणि बाजारमूल्य वाढले होते.  उदाहरणार्थ, कोहलीच्या एमपीएल जाहिराती आणि धोनीच्या ड्रीम11 कॅम्पेन यांनी तरुण चाहत्यांमध्ये प्रचंड उत्साह निर्माण केला होता.