Vinesh Phogat: भारतीय फ्रीस्टाइल कुस्तीपटू विनेश फोगाटला ३० आणि ३१ मे रोजी होणाऱ्या आशियाई खेळांच्या निवड चाचण्यांमध्ये सहभागी होण्याची परवानगी देण्यात आली आहे. सर्वोच्च न्यायालयाने दिल्ली उच्च न्यायालयाचा आदेश कायम ठेवला आणि भारतीय कुस्ती महासंघाच्या (WFI) याचिकेवर नोटीस बजावली आहे.

पुढील सुनावणी आता १ जून रोजी होणार आहे. मात्र, न्यायालयाने विनेश फोगाटच्या विनंतीवर अनेक प्रश्नही उपस्थित केले आहेत. न्यायालयाने, विनेश फोगाट ही एक सामान्य खेळाडू नाही; तिने अनेक यश मिळवले आहेत, पण त्यांच्याही अगोदर देश प्रथम येतो” म्हटले आहे.

विनेश फोगाटला चाचण्यांमध्ये सहभागी होण्याची परवानगी देताना सर्वोच्च न्यायालय म्हणाले, “चाचण्या उद्या असल्याने, आम्ही तुम्हाला रोखू इच्छित नाही. तथापि, उच्च न्यायालयाच्या आदेशाबाबत आमचे अनेक प्रश्न आहेत. तुम्हाला त्यांची उत्तरे द्यावी लागतील.”

दिल्ली उच्च न्यायालयाने विनेश फोगाटला २०२६ च्या आशियाई खेळांच्या निवड चाचण्यांमध्ये सहभागी होण्याची परवानगी दिली होती, परंतु भारतीय कुस्ती महासंघाने (WFI) या निर्णयाला सर्वोच्च न्यायालयात आव्हान दिले होते. आज डब्ल्यूएफआयच्या याचिकेवर सुनावणी करताना, सर्वोच्च न्यायालयाने विनेश फोगट यांना, “तुम्ही एक सामान्य खेळाडू नाही, पण आम्हाला काही प्रश्न विचारायचे आहेत.” असे सांगितले.

विनेश फोगट यांच्या वकिलाने सर्वोच्च न्यायालयाला विनंती करताना, “मी फक्त चाचण्यांमध्ये सहभागी होण्याची विनंती करत आहे. एक वर्षापूर्वी आई झालेली एक महिला, तिला चाचण्यांमध्ये सहभागी होण्याची परवानगी द्यावी, एवढीच न्यायालयाला विनंती करत आहे.” असे म्हटले आहे.

या याचिकेला उत्तर देताना, सर्वोच्च न्यायालयाने , १४ डिसेंबर २०२४ रोजी तिने विश्रांती घेतली, नंतर ती आई झाली आणि तिने डोपिंग चाचणीत भाग घेतला नाही. तिने तिच्या ठिकाणाची माहितीसुद्धा दिली नाही” असे म्हटले.  न्यायाधीशांनी पुढे सांगितले की, “नंतर तिने विधानसभेच्या कामकाजात व्यस्त असल्याचे सांगितले, परंतु तिचे स्पष्टीकरण स्वीकारले गेले नाही.

सर्वोच्च न्यायालयाने पुढे म्हटले की, आशियाई खेळांची प्रक्रिया फेब्रुवारी २०२६ मध्ये सुरू झाली होती आणि त्यांना चार खेळांमध्ये भाग घेणे आवश्यक होते, जे त्यांनी केले नाही. तुम्ही मे महिन्यात सक्रियपणे याचिका दाखल केली.

न्यायाधीश पुढे म्हणाले, “आपण हे लक्षात ठेवले पाहिजे की भारतीय खेळ जागतिक खेळांशी जोडलेले आहेत. क्रीडा संघटनेचे नियम वगळणारे आहेत, असा उच्च न्यायालयाचा निर्णय विचित्र होता. हे नियम खूप काळापासून अस्तित्वात आहेत आणि ते सर्वांना लागू होतात. तुम्ही क्रीडा क्षेत्रात अनेक यश मिळवले आहेत, पण देश प्रथम येतो.” Vinesh Phogat: