BJP News : दीर्घ आजारपणाशी झुंज दिल्यानंतर अखेर तब्बल आठ महिन्यांनी भाजपचे (BJP News) ज्येष्ठ नेते आणि माजी आदिवासी विकास मंत्री डॉ. विजयकुमार गावित पुन्हा एकदा सक्रिय राजकारणात परतले आहेत. मुंबईतून नंदुरबारमध्ये पाऊल ठेवताच दुसऱ्याच दिवसापासून त्यांनी थेट मैदानात उतरून जनसंपर्क मोहिमेला सुरुवात केली.

नुकत्याच शहरातील एका हॉटेलमध्ये पार पडलेल्या कार्यकर्त्यांच्या मेळाव्यात त्यांनी उपस्थितांशी थेट संवाद साधला. तब्बल आठ महिन्यांनंतर आपल्या नेत्याचा आवाज कानावर पडताच सभागृहातील कार्यकर्त्यांच्या डोळ्यांत पाणी तरळले आणि संपूर्ण वातावरण भावुक झाले होते.

आजारपणावर यशस्वी मात करून गावितांनी पुन्हा एकदा जिल्ह्याची सूत्रे आपल्या हाती घेतल्याने निष्ठावंत कार्यकर्त्यांमध्ये नवा उत्साह संचारला आहे.या मेळाव्यात नंदुरबार विधानसभा मतदारसंघातील मतदारयादी विशेष सखोल पुनरीक्षण मोहिमेचा आढावा घेण्यात आला.

आगामी निवडणुकांची गणिते लक्षात घेता, एकाही हक्काच्या मतदाराचे (BJP News) नाव यादीतून सुटू नये आणि कोणत्याही प्रकारची दुबार नोंदणी होऊ नये, यासाठी गावितांनी पदाधिकाऱ्यांना अत्यंत दक्ष राहण्याच्या आणि काटेकोर नियोजन करण्याच्या स्पष्ट सूचना दिल्या.

१९९५ पासून सलग नंदुरबार विधानसभा मतदारसंघावर डॉ. विजयकुमार गावित यांचे एकहाती वर्चस्व राहिले आहे. काँग्रेसचा अभेद्य बालेकिल्ला मानल्या जाणाऱ्या या आदिवासी पट्ट्यात त्यांनी भाजपचे भक्कम नेटवर्क उभे केले आणि दीर्घकाळ मंत्रिपद सांभाळत जिल्ह्याच्या सत्तेची दोरी आपल्या हाती ठेवली. पुढे त्यांच्या कन्या डॉ. हिना गावित यांनीही सलग दोन वेळा लोकसभा जिंकत गावित घराण्याचा दबदबा कायम ठेवला.

मात्र, २०२४ च्या लोकसभा निवडणुकीत काँग्रेसचे गोवाल पाडवी यांच्याकडून डॉ. हिना गावित यांचा पराभव झाला आणि त्यानंतर राज्य मंत्रिमंडळातही विजयकुमार गावित यांना स्थान मिळाले नाही. या लागोपाठच्या राजकीय धक्क्यांमुळे गावित कुटुंब काहीसे बॅकफूटवर गेल्याची चर्चा सुरू झाली होती.

दुसरीकडे, सध्या नंदुरबारमधील राजकीय समीकरणे कमालीची गुंतागुंतीची झाली आहेत. महायुतीमधील भाजप आणि शिवसेना यांच्यातच स्थानिक पातळीवर तीव्र संघर्ष पाहायला मिळत असून, एकीकडे गावित आणि दुसरीकडे (BJP News) त्यांचे सर्व विरोधक अशी उघड विभागणी झाली आहे. शिवसेनेचे वाढते आव्हान पाहता स्थानिक स्वराज्य संस्थांच्या निवडणुका स्वबळावर लढण्याचा पवित्रा गावितांनी यापूर्वीच घेतला आहे.

अशा परिस्थितीत आजारपणातून सावरल्यानंतर आता पक्षांतर्गत नाराजी, महायुतीमधील कुरघोडी आणि विरोधकांचे आव्हान या सर्व आघाड्यांवर डॉ. गावित कसा मुकाबला करतात, याकडे संपूर्ण उत्तर महाराष्ट्राचे लक्ष लागले आहे.