नवी दिल्ली : केंद्रीय मंत्री आणि अमेठीतील खासदार स्मृती इराणी या नेहमी कोणत्या ना कोणत्या कारणावरून चर्चेत असतात. सध्या  त्यांच्याच लोकसभा मतदारसंघातला एक व्हिडीओ सोशल मीडियावर मोठ्या प्रमाणात व्हायरल होत आहे. या व्हिडीओत त्या एका पत्रकारावर संतप्त झाल्याचे पाहायला मिळत आहे.  दरम्यान, यावरून आता पुन्हा एकदा काँग्रेसने भाजपवर टीका करण्यास सुरुवात केली आहे.

स्मृती इराणींचा एक व्हिडीओ काँग्रेसकडून ट्वीट करण्यात आला आहे. या व्हिडीओमध्ये स्मृती इराणी एका पत्रकाराला “माझ्या मतदारसंघातल्या लोकांचा अपमान करू नका”, असे त्यांच्या शैलीत बजावताना दिसून येत आहे. “मी काय आहे हे मला माहिती आहे. सलोन विधानसभा माझ्या लोकसभा मतदारसंघाचा भाग आहे. तुम्ही त्या लोकांचा अपमान करू नका. तुम्ही जर माझ्या क्षेत्राचा अपमान कराल, तर मी तुमच्या मालकांना फोन करेन. तुम्ही असाल मोठे पत्रकार, पण तुम्हाला जनतेचा अपमान करण्याचा अधिकार नाही. मी फार प्रेमाने तुम्हाला सांगतेय”, अशा स्पष्ट शब्दात स्मृती इराणी पत्रकाराला झापताना दिसत आहेत.

स्मृति ईरानी जी पत्रकार को धमका रही हैं। मालिक को फोन करके नौकरी खाने का विचार है।

लगता है पत्रकार ने पूछ लिया होगा- 13 रुपए में चीनी कब मिलेगी?

या गैस सिलेंडर के दाम कम कब होंगे?

या बेटियों के साथ हुए अत्याचार पर चुप क्यों हैं?

जवाब देते न बना तो धमकी पर उतर आईं।

स्मृति… pic.twitter.com/YsgijkJl4v

— Congress (@INCIndia) June 9, 2023

स्मृती इराणींचा हा व्हिडीओ ट्वीट करत काँग्रेसने टीका करण्यात सुरुवात केली आहे.  यामध्ये काँग्रेसने “स्मृती इराणीजी पत्रकाराला धमकावत आहेत. मालकाला फोन करून त्याची नोकरी घालवण्याचा विचार आहे. असं वाटतंय पत्रकारानं विचारलं असेल १३ रुपयात साखर कधी मिळेल? किंवा गॅस-सिलेंडरच्या किंमती कमी कधी होणार? किंवा महिलांवर होणाऱ्या अत्याचारांवर तु्म्ही गप्प का? उत्तर देता आलं नाही, तर धमकी द्यायला लागल्या. स्मृती इराणीजी हे प्रेम नाही”, अशा खोचक शब्दात काही सवाल करत काँग्रेसने इराणींवर टीका केली आहे.

हे दिव्य प्राणी धन्य हुँ पुनः दर्शन पाके।अमेठी की जनता से बदतमीज़ी ना करें ये अनुरोध था जो शायद आप ना समझें । आप अमेठी की जनता का अपमान सह सकते हैं , मैं नहीं । जहां तक सवालों का विषय है तो बतायें पूर्व सांसद से कब डिबेट करनी है ? चीनी क्या आटे दाल का भी भाव बता दूँगी 🙏 https://t.co/qxkV1UqBcF

— Smriti Z Irani (@smritiirani) June 9, 2023

काँग्रेसच्या ट्वीटला स्मृती इराणींनी खोचक प्रत्युत्तर दिलं आहे. “हे दिव्य प्राणी, तुमचं पुन्हा दर्शन घेऊन मी धन्य झाले. अमेठीच्या जनतेचा अपमान करू नका, हे मी सांगत होते. पण कदाचित तुम्हाला समजलं नसेल. तुम्ही अमेठीच्या जनतेचा अपमान सहन करू शकता, मी नाही. आणि प्रश्नांचं म्हणाल, तर सांगा माजी खासदारांशी (राहुल गांधी) कुठे चर्चा करायची आहे? साखरच काय, डाळ, पिठाचा भावही सांगेन”, असे इराणी ट्वीटमध्ये म्हणाल्या आहेत.

दरम्यान,ज्या माध्यमसमूहाचे नाव घेऊन स्मृती इराणींनी संबंधित पत्रकाराला सुनावले आहे, त्या समूहाने “स्मृती इराणी आणि एका पत्रकाराच्या संभाषणाचा व्हिडीओ व्हायरल होतोय. पण त्यातील विपिन यादव नावाचे पत्रकार आमच्याशी संबंधित नाहीत. अमेठी लोकसभा मतदारसंघात आमचा पूर्णवेळ पत्रकार नाही. स्टिंगरही नाही”, असा खुलासा या माध्यम समूहाने केला आहे.