Vice President of India Election: उपराष्ट्रपती पदासाठी ९ सप्टेंबर रोजी होणाऱ्या निवडणुकीसाठी राजकीय रंगमंच सज्ज झाला आहे. भाजपच्या नेतृत्वाखालील एनडीए आघाडीने महाराष्ट्राचे राज्यपाल सी. पी. राधाकृष्णन यांना आपला उमेदवार म्हणून घोषित केले आहे, तर इंडिया आघाडीने सर्वोच्च न्यायालयाचे माजी न्यायमूर्ती बी. सुदर्शन रेड्डी यांना उमेदवारी दिली आहे. आकड्यांच्या खेळात एनडीए सध्या आघाडीवर दिसत आहे. पण, इंडिया आघाडीचा उमेदवार किती टक्कर देऊ शकेल, हे पाहणे औत्सुक्याचे ठरेल.

जिंकण्यासाठी किती खासदारांचा पाठिंबा आवश्यक?
उपराष्ट्रपती निवडणुकीत केवळ खासदारच मतदान करतात. यासाठी लोकसभा आणि राज्यसभेतील खासदारांना मिळून निवडणूक मंडळ तयार केले जाते. सध्या संसदेच्या दोन्ही सभागृहांतील खासदारांची एकूण संख्या ७८२ आहे. याचा अर्थ, विजयासाठी ३९२ खासदारांचा पाठिंबा आवश्यक आहे. सध्या लोकसभेत ५४२, तर राज्यसभेत २४० खासदार आहेत.

आकड्यांनुसार, एनडीएच्या बाजूने ४२७ खासदारांचा पाठिंबा आहे, तर विरोधकांकडे ३५५ खासदार आहेत. एनडीएचे लोकसभेत २९३ आणि राज्यसभेत १३४ खासदार आहेत. दुसरीकडे, विरोधी पक्षांकडे लोकसभेत २४९ आणि राज्यसभेत १०६ खासदार आहेत. मात्र, विरोधी पक्षांतील सर्व खासदार इंडिया आघाडीच्या उमेदवारालाच मतदान करतील, याची खात्री नाही. काही खासदार मतदानादरम्यान अनुपस्थित राहू शकतात, तर कोणत्याही आघाडीत सहभागी नसलेले पक्ष आपल्या खासदारांना कोणत्याही उमेदवाराला मत देण्याचे निर्देश देऊ शकतात.

जगदीप धनखड यांनी रचला होता विक्रम
२०२२ मध्ये झालेल्या उपराष्ट्रपती निवडणुकीत एनडीएने जगदीप धनखड यांना उमेदवार बनवले होते, तर विरोधकांनी मार्गारेट अल्वा यांना मैदानात उतरवले होते. या निवडणुकीत ७२५ खासदारांनी मतदान केले होते, त्यापैकी १५ मते अवैध ठरली होती. धनखड यांना ५२८ मते मिळाली, तर अल्वा यांना केवळ १८२ मते मिळाली. यामुळे धनखड यांनी ३४६ मतांच्या विक्रमी फरकाने विजय मिळवला होता.

दरम्यान, सध्याच्या आकड्यांनुसार एनडीएचा उमेदवार राधाकृष्णन यांचा हात वरचढ दिसत आहे. मात्र, इंडिया आघाडीचा उमेदवार सुदर्शन रेड्डी किती मते खेचू शकतात, हे मतदानाच्या निकालानंतरच स्पष्ट होईल. ही निवडणूक राजकीय रणनीती आणि गटबाजीच्या दृष्टीनेही महत्त्वाची ठरणार आहे.