Venkateshkrupa Sugar – जातेगाव बुद्रुक (ता. शिरूर) येथील व्यंकटेशकृपा शुगर मिल्स साखर कारखान्याने 2026-2027 च्या लागवड हंगामासाठी तसेच 2027-2028 च्या गळीत हंगामासाठी ऊस लागवड धोरण जाहीर केले आहे. हे धोरण वसंतदादा शुगर इन्स्टिट्यूट, मांजरी बुद्रुक यांच्या मार्गदर्शनाखाली निश्चित करण्यात आले आहे. कारखान्याने विविध हंगामांसाठी ऊस वाणांची निवड जाहीर करत शेतकर्‍यांना उत्पादनवाढ आणि खर्च बचतीसाठी आधुनिक तांत्रिक सूचना दिल्या आहेत.

कारखान्याने ऊस उत्पादक शेतकर्‍यांना उत्पादन खर्च कमी करून उत्पादन वाढवण्यासाठी आधुनिक पद्धतींचा अवलंब करण्याचे आवाहन केले आहे. ऊस रोपांची लागवड 5 बाय 1.5 फूट अंतरावर करावी. त्यामुळे ऊस बेणे, तोडणी, वाहतूक, पाणी व तणनाशक खर्चात मोठी बचत होऊ शकते. यांत्रिक पद्धतीने ऊस तोडणी करू इच्छिणार्‍या शेतकर्‍यांनी दोन सरींमधील अंतर किमान 5 फूट ठेवावे. लागवडीसाठी 9 ते 10 महिन्यांचे शुद्ध बेणे वापरण्याचा सल्ला देण्यात आला आहे.

दोन डोळ्यांच्या टिपर्‍या वापरताना दोन टिपर्‍यांमध्ये 9 इंच अंतर ठेवावे. शेतकर्‍यांनी प्रथम माती परीक्षण करून घ्यावे आणि त्यानुसारच रासायनिक खतांचा वापर करावा. गळीत हंगामाच्या अखेरपर्यंत तुटलेल्या उसाचा खोडवा राखण्याचेही आवाहन कारखान्याने केले आहे. शेतकर्‍यांच्या मागणीनुसार कारखान्यामार्फत मान्यताप्राप्त नर्सरीमधून दर्जेदार ऊस रोपे रास्त दरात रोखीने उपलब्ध करून दिली जाणार असल्याची माहिती कारखान्याने परिपत्रकाद्वारे दिली आहे.

हंगामनिहाय ऊस वाणांची शिफारस
अडसाली हंगाम (1 जून 2026 ते 31 ऑगस्ट 2026)- को एम 0265, को 86032, फुले ऊस 13007, फुले ऊस 14012, फुले ऊस 15006.
पूर्व हंगामी लागवड (1 सप्टेंबर 2026 ते 30 नोव्हेंबर 2026)- को एम 0265, को 86032, को व्हीएसआय 18121, फुले ऊस 15006, फुले ऊस 14012. सुरू हंगाम (1 डिसेंबर 2026 ते 31 मार्च 2027)- को एम 0265, को 86032, को व्हीएसआय 18121, फुले ऊस 13007, फुले ऊस 15006, फुले ऊस 14012, एमएस 10001.