मांजरी (विवेकानंद काटमोरे) – मांजरी बुद्रुक येथील वसंतदादा शुगर इन्स्टिट्यूटच्या वतीने (व्हीएसआय) देण्यात येणारा यंदाचा कै. वसंतदादा पाटील ” सर्वोत्कृष्ट साखर कारखाना पुरस्कार ” कडेगाव-सांगली येथील डॉ. पतंगराव कदम सोनहीरा साखर कारखान्याला जाहीर करण्यात आला आहे. तशी घोषणा व्हीएसआयचे उपाध्यक्ष व राज्याचे माजी गृहमंत्री दिलीप वळसे पाटील यांनी पत्रकार परिषदेत केली.

‘व्हीएसआय’ची ४६ वी वार्षिक सर्वसाधारण सभा शनिवारी ,दि- २१ जानेवारीला होणार असून, माजी केंद्रीय कृषिमंत्री शरद पवार यांच्या अध्यक्षतेखाली मुख्यमंत्री एकनाथ शिंदे, सहकार मंत्री अतुल सावे यांच्या हस्ते पुरस्कारांचे वितरण केले जाणार असल्याचे ‘व्हीएसआय’चे महासंचालक संभाजी कडूपाटील तसेच संस्थेचे सल्लागार शिवाजीराव देशमुख यांनी पत्रकार परिषदेत सांगितले.

राज्यस्तरीय ऊस भूषण पुरस्कार पाडळी- हातकणंगले येथील शेतकरी राजाराम महादेव जाधव, केळझर -सटाणा येथील शेतकरी अनिता सुनील दळवी, वायगाव -उदगीर येथील शेतकरी बहादूर गुलाब शेख यांना जाहीर करण्यात आले आहेत. तसेच कोल्हापूर- कागल येथील श्री छत्रपती शाहू सहकारी साखर कारखान्याला कै. विलासरावजी देशमुख सर्वोत्कृष्ट उद्योजकता पुरस्कार, कै. डॉ. अप्पासाहेब उर्फ सा. रे. पाटील सर्वोत्कृष्ट ऊस विकास व संवर्धन पुरस्कार दौंड येथील दौंड शुगर प्रायव्हेट लिमिटेड या कारखान्याला तसेच
कै. कर्मयोगी शंकररावजी पाटील सर्वोत्कृष्ट आर्थिक व्यवस्थापन पुरस्कार कडेगाव सांगली येथील डॉ. पतंगराव कदम सोनहीरा सहकारी साखर कारखाना यांना जाहीर झाला आहे.

कुंडल- सांगली येथील क्रांतीअग्रणी डॉ.जी.डी. बापू लाड सहकारी साखर कारखान्याला कै. किसन महादेव उर्फ आबासाहेब वीर सर्वोत्कृष्ट पर्यावरण संवर्धन पुरस्कार, तर कै.रावसाहेबदादा पवार सर्वोत्कृष्ट आसवनी पुरस्कार धावरवाडी -सातारा येथील जयवंत शुगर लिमिटेड ला जाहीर झाला आहे.

ऊस भूषण पुरस्कारासाठी चिंचणी – कडेगाव येथील शेतकरी अकबर रमजान मुल्ला, कापूसखेड- वाळवा येथील शेतकरी अजित आनंदराव पाटील, बेंबळे- माढा येथील शेतकरी दीपाली हुलगे, पिंपळवाडी-जुन्नर येथील शेतकरी गोविंद भिकाजी रासकर, गोलेगाव -खेड येथील शेतकरी सत्यवान पोपट चौधरी, देवळाली -उस्मानाबाद येथील शेतकरी सुभाष लिंबाजी भिगडे यांची निवड करण्यात आली आहे. याशिवाय वसंतदादा शुगर इन्स्टिट्यूट मध्ये उत्कृष्ट कामगिरी केलेले कर्मचारी काकासाहेब एस. कोंडे, प्रदीप पी. शिंदे, वंदन पी. घुले, अशोक दगडे यांना रोख रक्कम दहा हजार रुपये, मानचिन्ह व प्रशस्तीपत्र देवून गौरविण्यात येणार असल्याचे महासंचालक कडू पाटील यांनी यावेळी सांगितले.

विभागवार तांत्रिक कार्यक्षमता पुरस्कार दक्षिण विभागात प्रथम पारितोषिक कलाप्पाअण्णा आवाडे जवाहर शेतकरी साखर कारखाना, मध्य विभाग प्रथम पारितोषिक नीरा-भीमा सहकारी साखर कारखाना, द्वितीय पारितोषिक माळेगाव सहकारी साखर कारखाना, तृतीय पारितोषिक लोकनेते मारुतराव घुले पाटील ज्ञानेश्वर सहकारी साखर कारखाना, तर उत्तर पूर्व विभागात प्रथम पारितोषिक विलास सहकारी साखर कारखाना, द्वितीय पारितोषिक कर्मयोगी अंकुशराव टोपे समर्थ सहकारी साखर कारखाना यांना जाहीर करण्यात आले आहेत.

वैयक्तिक पुरस्कारामध्ये उत्कृष्ट शेती अधिकारी संतोष चंद्रकांत कुमटेकर, उत्कृष्ट पर्यावरण अधिकारी संतोष विठ्ठलराव गव्हाणे, उत्कृष्ट चीफ इंजिनियर विजय मधुकर मोरे, उत्कृष्ट चीप केमिस्ट मिलिंद पृथ्वीराज चव्हाण, उत्कृष्ट फायनान्स मॅनेजर दिलीप दगडू लव्हटे, उत्कृष्ट आसवनी व्यवस्थापक अनिल महादेव शिंदे, उत्कृष्ट कार्यकारी संचालक रामचंद्र धिरेंद्रराव माहुली यांचा समावेश आहे.