काराकस : व्हेनेझुएलामध्ये अध्यक्षीय निवडणुकांच्या निकालावरून सुरू झालेल्या आंदोलनामुळे अध्यक्ष निकोलस मादुरो यांनी एक पाऊल मागे घेतले आहे. मादुरो यांनी या निवडणूक निकालांचे ऑडिट करण्याची सूचना देशातील सर्वोच्च न्यायालयाला केली आहे. निवडणुकीमध्ये मादुरो यांचा विजय झाल्याची घोषणा निवडणूक प्राधिकरणाने केली होती. हा निकाल अमान्य करत विरोधकांनी देशव्यापी आंदोलनाला सुरुवात केली होती.

विरोधकांबरोबर आंतरराष्ट्रीय समुदायाकडूनही मतमोजणीचा तपशील जाहीर करण्याची मागणी केली जाऊ लागली होती. त्यानुसार मादुरो यांनी मतमोजणीची आकडेवारी प्रसिद्ध करायला आपल्या पक्षाची तयारी असल्याचे पत्रकारांना सांगितले. सर्वोच्च न्यायालयाने मतमोजणीचे ऑडिट करावे. त्यासाठी सर्वोच्च न्यायालयाकडून आपल्याला समन्स यावे, आपली चौकशी व्हावी आणि तपासही व्हावा, असेच आपल्याला वाटते असल्याचे मादुरो यांनी म्हटले आहे.

इलेक्ट्रॉनिक मतदान यंत्रांतून मिळणाऱ्या दोन तृतीयांश पेक्षा जास्त टॅली शीट आपण मिळवल्या असून या टॅली शीटची बेरीज केल्यास मादुरो यांचा पराभव झाल्याचे सहज सिद्ध होत असल्याचे प्रमुख विरोधी उमेदवार एडमंड गोन्झेलेझ आणि विरोधी नेत्या मारीय कोरीना माचादो यांनी म्हटले आहे. तर निवडणूक मतदान यंत्र हॅक झाली असल्याचे मादुरो यांनी म्हटले आहे. हा आपल्या सरकारविरोधातला कट असून या संदर्भात आपल्याकडे कोणताही पुरावा नसल्याचेही त्यांनी सांगितले. दरम्यान निवडणुका घेणाऱ्या नॅशनल इलेक्टोरल कौन्सिलने मतमोजणीचा तपशील जाहीर करावा, यासाठी आंतरराष्ट्रीय दबाव वाढू लागला आहे. कौन्सिलवर मादुरो यांच्या युनायटेड सोशॅलिस्ट पार्टी ऑफ व्हेनेझुएलाच्या निष्ठावंतांची वर्णी लागलेली असल्यामुळे पक्षपातीपणाचा आरोप होतो आहे.