Venezuela Earthquake – व्हेनेझुएलामध्ये आज पहाटेच्या सुमारास पुन्हा भूकंपाचे धक्के जाणवले. गेल्या आठवड्यात आलेल्या विनाशकारी भूकंपाच्या दुहेरी धक्क्यांनंतर मदत आणि बचावकार्य सुरू असताना हे धक्के जाणवले आहेत.

आज सकाळी ७ वाजण्याच्या सुमारास झालेल्या भूकंपाची तीव्रता ४.६ रिश्‍टर इतकी नोंदली गेली आणि त्याचा केंद्रबिंदू व्हेनेझुएलाच्या कॅरिबियन किनाऱ्याजवळच्या काराबाल्लेदा पासून उत्तरेला २७ किलोमीटरवर होता, असे यूएस जिऑलॉजिकल सर्व्हेने म्हटले आहे.

भूकंपामुळे झालेल्या अतिरिक्त नुकसानीचे कोणतेही तात्काळ वृत्त नाही. मात्र राजधानी काराकासमधील रहिवासी भयभीत झाले आणि रस्त्यावर धावले. पाच दिवसांपुर्वी झालेल्या भूकंपाचा सर्वाधिक फटका बसलेल्या ला गुएरा येथेही आजच्या भूकंपाचे धक्के जाणवले.

यापुर्वीच्या भूकंपामध्ये मरण पावणाऱ्यांची संख्या १,४५० इतकी झाली आहे आणि अजूनही इमारतींच्या ढिगाऱ्यांखाली अनेकजण गाडले असण्याची भीती व्यक्त होते आहे. जगभरातून २,६०० हून अधिक बचाव कर्मचारी प्रशिक्षित श्‍वानपथक आणि यंत्रसामग्रीसह दाखल झाले असल्याचे व्हेनेझुएला सरकारने म्हटले आहे.

भारताच्या मदतीने फिल्ड हॉस्पिटल सुरू

व्हेनेझुएलामधील भूकंपग्रस्तांच्या मदतीसाठी भारताने पाठवलेली मदत तेथे पोचली असून भारतीय लष्कराचे फिल्ड हॉस्पिटल सुरू झाले आहे. तेथे जखमींना पुर्ण क्षमतेने उपचार दिले जात आहेत, असे अधिकाऱ्यांनी सांगितले.

अत्यंत अनुभवी डॉक्टरांच्या भारतीय वैद्यकीय पथकाने कराकस येथील आंतरराष्ट्रीय ला रिनकोनाडा रेसट्रॅकवर एक आरोग्य शिबिर उभारले आहे, असे व्हेनेझुएलामधील भारतीय दूतावासाने सांगितले.